Gia la damaun baud ha il club da fans Simonet fatg viadi cun il bus davent da Casti ad Adelboden. Per l’emprima giada è il club da fans dals skiunzs rumantschs gia la sonda da la partida ad Adelboden. Questa giada per sustegnair il «giuven» dals frars Simonet, Livio Simonet. Ed il sustegn sin il lieu ha dà schlantsch a Livio Simonet. Il skiunz da 25 onns ha terminà il slalom gigant dad Adelboden sin plazza 22.
Sco Livio duess uss era far Sandro Simonet
Anc n'è quai betg la gronda amur tranter Sandro Simonet ed il slalom ad Adelboden. Anc mai en sia carriera n'ha Sandro Simonet pudì ir per puncts tar in slalom ad Adelboden. Questa giada duai quai vegnir auter. Cun il sustegn dals fans duessan vegnir ils emprims puncts. Ils fans en mintga cas èn da buna speranza, e suenter che Livio Simonet ha fatg il cumenzament po quai be vegnir meglier era tar Sandro Simonet.
