La partiziun da juniors dal campiun actual, l'EV Zug, è ferma. L’equipa da l’elita U20 ha gudagnà duas giadas en roda il titel da campiun svizzer. Gia avant aveva l’equipa dals noviz d’elita dal EVZ gudagnà quest titel. Part da quests success dals ultims onns è er Tiziano Pauchard da Madulain stà. Il giuven hockeyan engiadinais era ì sco giuven a Zug per cumbinar en Svizra Centrala scola e sport da moda optimala. Uss suenter tschintg onns en l’organisaziun da l'EV Zug vul il defensur da l’equipa naziunala sut 20 onns in midament. El emprova a Rapperswil da far il pass tar ils profis.
Per vesair insatge auter e per far il pass tar ils profis mid jau tar Rapperswil.
Nova sfida tar ils Rapperswil Jona Lakers
Suenter ils onns a Zug è Tiziano Pauchard sa decidì per ina nova sfida. Pervia che l’equipa da l'EVZ Academy è sa retratga dal campiunadi en la Swiss League è Pauchard ì a la tschertga d'ina autra pussaivladad per s'approximar al hockey dals creschids. A Rapperswil ha el chattà questa sfida. Sur il schef da sport Janik Steinmann ha quai dà l’emprim contact cun Rapperswil. Suenter ina partida da test cun ils Lakers encunter Ambri il favrer, era cler che Tiziano Pauchard emprova da midar en il chantun Son Gagl. Tar l’equipa che cumbatta per ina plazza en il mez final dal campiunadi svizzer cunter il Club da hockey da Tavau vul il hockeyan engiadinais far il proxim pass.