Actualmain sa prepara Selina Egloff da Scuol sin ils examens da la matura. Questa primavaira va a fin per ella il temp da scola al gimnasi da sport a Tavau. Alura ha ella terminà per il mument ses temp da scolaziun e sa po concentrar puspè plainamain sin il sport da skis, sia gronda passiun.
Jau aveva problems cun la sanadad, jau na steva betg pli bain. Perquai hai jau decis da rumper giu la stagiun.
Bun cumenzament ed alura rut giu la stagiun
La preparaziun sin la nova stagiun da skis aveva Selina Egloff fatg per part en Engiadina. Era las emprimas cursas da FIS ha ella pudì far sin la Diavolezza. Davent da l’entschatta era ella sin il podest. Er tar las cursas da la cuppa d’Europa era ella sin buna via. Ad Andalo en Italia è ella vegnida segunda en il slalom gigant. Er pervia da quai è la giuvna skiunza engiadinaisa vegnida nominada per las cursas da la cuppa mundiala a Courchevel ed a Zagreb. Quellas cursas n'èn alura betg pli idas uschè bain. Suenter las cursas da la cuppa mundiala ed il return en la cuppa d’Europa ha Selina Egloff decidì da rumper giu la stagiun. Ella ha survegnì problems cun la sanadad.
Il schaner rut giu la stagiun e fatg pausa
Gest suenter ch'ella ha decidì da rumper giu la stagiun pervia da problems cun la sanadad ha ella anc dà in zichel scola da skis tar ella a chasa a Scuol. Alura è Selina Egloff ida en vacanzas. Actualmain viva ella sco ch’ella di ina vita normala. Ella lavura ed as prepara sin ils examens da matura. Suenter as vul ella puspè concentrar sin il sport da skis e puspè cumenzar cun il trenament.