Siglir tar il cuntegn

Diamond League en China Soras Kambundji sin plazzas 6 e 7

Tar l'emprima concurrenza da la Diamond-League da l'atletica leva en China ha Ditaji Kambunji cuntanschì il 7avel plaz sur 100 meters cursa d'obstachels, sia sora Mujinga è vegnida 6avla sur 200 meters currer. Tar il sigl cun l'asta hai dà in nov record mundial.

La concurrenza da sigl cun l'asta è stà la show d'ina persuna. Armand Duplantis ha gudagnà quella senza problems e silsuenter anc – per schluppettar giu il pum – laschà metter la latta sin 6,24 meters. Quella autezza ha il Svedais dumagnà en l'emprima emprova e cunquai meglierà ses agen record mundial per 1 centimeter.

Ditaji e Mujinga Kambundji

Las duas soras bernaisas n'han betg pudì tegnair pass cun las meglras atletas dal mund. Ditaji è vegnida 7avla sur 100 meters cursa d'obstachels, en 12,7 secundas. Quai è il meglier temp ch'ella ha fin uss fatg a l'entschatta d'ina stagiun. Gudagnà la cursa ha la campiunessa olimpica Jasmine Camacho-Quinn, avant Devynne Charlton.

Era per la sora veglia da Ditaji, Mujinga n'hai betg funcziunà dal tut. Ella è vegnida 6avla sur ils 200 meters. Cun 23,39 secundas è ella 1,3 secundas pli plauna che ses meglier temp. Gudagnà ha Torrie Lewis da l'Australia avant la campiunessa mundiala Sha'Carri Richardson dals Stadis Unids da l'America.

RTR novitads 16:00

Artitgels legids il pli savens