La victoria en il slalom va a l'Austriaca Katharina Liensberger. La skiunza era gia suenter l'emprim percurs a la testa dal classament ed è er en il segund percurs stada ina classa per sasezza. In'entira secunda pli svelta che la Slovaca Petra Vlhova e gist duas secundas pli svelta che la dominatura da las ultimas stagiuns, l'Americana Mikaela Shiffrin, è Liensberger stada a l'arrivada.
Shiffrin da sia vart ha stuschà en il segund percurs Wendy Holdener giu dal podest. Holdener ch'aveva suenter l'emprim percurs anc in pitschen avantatg sin l'Americana ha bain er mussà ina ferma prestaziun en il segund percurs, ha dentant curt a la fin fatg in pitschen sbagl – quel ha dentant tanschì per crudar sper il podest giu.
Resultat final
- Katharina Liensberger 1:39.50
- Petra Vlhova +1.00
- Mikaela Shiffrin + 1.98
- Wendy Holdener +2.34
Rast fa il pass tranter la top 10
Per ina pitschna surpraisa procura Camille Rast. La giuvna da 21 onns mussa ina buna prestaziun ed arriva sco 8avla en l'arrivada. Igl è l'emprima plazza da top 10 per Rast a campiunadis mundials.
Betg gartegià è il slalom a Michelle Gisin e Mélanie Meillard. Gisin è crudada ora suenter l'emprim temp intermediar. Igl è bain ina trumpada per la skiunza ch'è naschida a Samedan – era ella ina da las grondas favuritas per ina medaglia. Mélanie Meillard ha fatg il pass sco 16avla en il segund percurs. Là e la sora da Loic Meillard dentant crudada ora.
