Sco giugader-clav ha briglià il Finlandais Sami Vatanen. El a procurà cun in solo en la quarta minuta, ed in ulteriur gol en l'otgavla minuta – che Genevra è stà baud en avantatg. Bain ha il chapitani Gaëtan Haas anc sveglià in zic speranza tar Bienna – cun ses gol en la 31avla minuta. Per volver la partida n'ha quai betg tanschì.
Sisavla partida
Bienna gudogna a chasa la sesavla partida cun 4:2 ed egualisescha uschia la seria da final a 3:3. Bain èn ils Genevrins ids èn avantatg cun 1:0 en l'emprim terz entras Linus Omark. Grazia a Toni Rajala e Luca Hischier en il segund terz han ils da Bienna però svelt chattà ina resposta sin l'avantatg da Genevra. Tschintg minutas avant la fin ha Gaëtan Haas alura segirà la victoria per Bienna. Uss sto «la belle» decider – la 7avla partida finala gievgia saira a Genevra.
Tschintgavla partida
A Genevra manca anc ina victoria per daventar per l'emprima giada insumma campiun svizzer: Ils Genevrins han declassà Bienna gist cun 7:1. En la seria da «Best-of-Seven» maina Genevra uss cun 3:2.
Quarta partida
En la quarta partida gievgia saira ha Genevra egualisà la seria al 2:2 cun batter Bienna ordaifer cun 3:2. L'um cun il maun dad aur tar Servette è stà Marc-Antoine Pouliot ch'ha marcà dus gols. Il center svizzer-canadais ha egualisà en la 19avla minuta al 1:1 e marcà il gol decisiv al 3:2 en la 51avla minuta.
Terza partida
En la terza partida mardi saira han ils da Bienna gudagnà ordaifer cun 2:1 suenter prolungaziun. Il gol decisiv ha sajettà Yanick Stampfli pir en la 78avla minuta suenter in sbagl dal defensur da Genevra Sami Vátanen.
Segunda partida
Bienna ha gudagnà la segunda partida dal final dals playoffs a chasa cunter Genevra cun 3:2. Il gol decisiv per Bienna ha fatg Brunner set secundas avant la fin da la partida. En la seria da «best-of-seven» statti uss pari 1:1.
Emprima partida
Grazia a dus gols «tschufs» ha Genevra sia emprima victoria en ils playoffs da la liga naziunala da hockey. La partida è stada gulivada. Genevra-Servette ha dentant pudì far dapli gols che l'EHC Bienna, ed ha perquai sia settavla victoria en set gieus a chasa. Er la defensiun da la squadra genevrina è stada buna ed ha laschà tiers paucas schanzas als opponents.
Las premissas
Per l’emprima giada en l’istorgia dal hockey svizzer èsi vegnì en il final tar il duel tranter Genevra-Servette e l'EHC Bienna. Tuttas duas equipas eran en top-furma. Durant che Genevra-Servette ha eliminà en il mezfinal l’EV Zug, il dominatur dals davos dus onns, han ils da Bienna declassà en lur mezfinal ils ZSC Lions gist cun 4:0 victorias.
Ils Genevrins n'èn avant anc mai stats campiuns svizzers. Genevra-Servette è daventà en l’istorgia dal club set giadas vice-campiun svizzer, la davosa giada il 2010. Per Bienna fissi stà il quart titel. Ils emprims trais titels ha Bienna festivà tranter il 1978 ed il 1983.
