Las emprimas lutgas per la Festa federala a Pratteln èn enconuschentas. Il leader da la delegaziun grischuna Armon Orlik frunta sin il Friburgais Lario Kramer. Ses frar Curdin Orlik sa mesira en l'emprima lutga cun Marcel Bieri da la Svizra Orientala.
Er uschiglio spetgan inqual cumbats attractivs en l'emprima lutga da Pratteln – il manader tecnic da la Festa federala Stefan Strebel ha preschentà la mesemna il plan provisoric. Il dominatur da la stagiun e grond favurit Samuel Giger frunta sin Fabian Staudenmann, In ulteriur cumbat da vaglia munta il duel dal Son Gagliais Werner Schlegel cun il Bernais Matthias Aeschbacher, sco er il duel tranter Damian Ott ed il retg da la lutga Christian Stucki.
Entant èsi cler che Christian Stucki è da la partida a Pratteln. Quai communitgeschan ils organisaturs la gievgia. Ditg n'è quai betg stà cler, cunquai ch'el ha gì da sbatter l'ultim temp cun problems dal dies.
