Per il EHC Cuira ha la nova stagiun da la MySports League cumenzà mal – cun la terrada da 0:5 cunter Lyss. Fin mez da la partida eran ils Grischuns sulet cun in gol en retard. Lura han ils da Lyss sajettà en las davosas diesch minutas dal segund terz dus ulterius gols. A l'entschatta ed a la fin dal davos terz èn lura crudads ils davos dus gols – al resultat final da 0:5.
Meglier ha l'EHC Arosa realisà l'entschatta da la stagiun – cun gudagnar cun 5:2 cunter Wiki-Münsingen. Suenter 50 minutas era la partida anc pari 2:2, lura han ils giugaders d'Arosa dentant anc pudì sajettar trais ulteriurs gols al resultat final.
Resultats MySports League
Insumma betg sin turas è vegnì la sonda saira il HC Partenz-Signuradi, en sia emprima partida da questa stagiun. A Romanshorn han els gì da dar cunter ils Pikes EHC Oberthurgau – e pers gist cun 1:6. Il sulet gol ha Partenz-Signuradi sajettà al cumenzament dal segund terz, al 1:2. Ils Pikes han dentant grad reagì, e sis minutas pli tard eri gia 1:4.
Resultats 1. liga
Cun ina victoria cumenza il Cdh Engiadina la stagiun da 2. liga. En la halla Gurlaina han ils Engiadinais gudagnà cun 4:2 cunter Illnau-Effretikon. Stretg èsi anc vegnì en la 54avla minuta, cura ch'ils giasts han pudì scursanir al 3:2. Paucas secundas avant la fin ha Sandro Ritzmann lura sajettà in ulteriur gol per il Cdh Engiadina, al 4:2 final.
Era Lai-Valbella fa buna figura a l'entschatta da la stagiun da 2. liga – tar il SC Weinfelden fan ils Grischuns in 6:4. L'emprim gol ha Lai-Valbella sajettà suenter sulet 16 secundas. Fin la 28avla minuta han ils Grischuns lura marcà trais ulteriurs gols, dentant duas minutas avant la fin da la partida ha Weinfelden perfin pudì scursanira al 5:4. Duas secundas avant la fin ha il Grischun Ramon Pfranger lura segirà la victoria grischuna.