Gia cun la fin da sia carriera il december dal 2018 ha Sandro Viletta ditg: Jau emprov da far la scolaziun da trenader e da turnar. Ditg e fatg: Viletta è enavos en il circus da skis. A partir da la nova stagiun vegn il skiunz engiadinais ad esser trenader da la gruppa da slalom gigant. En emprima lingia vegn el a s’occupar dals skiunzs grischuns Thomas Tumler da Samignun e Daniele Sette da San Murezzan. Vitiers vegn il giuven talent Semyel Bissig.
Feridas, medaglia olimpica e fin andetga
Durant tut ils onns che Sandro Viletta è sez stà part da la cuppa mundiala han feridas adina puspè fatg quitads al skiunz da La Punt. Tuttina ha el pudì festivar a Beaver Creek sin ina da las pli pretensiusas pistas insumma sia emprima ed unica victoria en la cuppa mundiala. Vitiers vegn il success nunspetgà tar la super cumbinaziun dals gieus olimpics l’onn 2014 a Sotschi.
Suenter quels success mai pli sin il podest
Beaver Creek e Sotschi èn stads ils puncts culminants en la carriera da Sandro Viletta. Dentant era numerusas autras cursas nua che el ha savì mussar per part sia classa. Per in podest na ha quai dentant mai pli tanschi. Sandro Vileltta ha adina puspè gì numerusas feridas durant sia carriera. Quellas han la fin finala era sfurzà a Viletta da terminar sia carriera. Tut sias experientschas ch’el ha fatg durant quindesch onns en la cuppa mundiala vul el uss dar en per purtar a l’equipa da slalom gigant enavant.