Gia avant ils «gronds» stattan ils «pitschens» en il center. Tar il sprint d’uffants a Samedan cumbattan uffants e giuvenils en la vegliadetgna da set fin quattordesch onns en tschintg differentas categorias per plazzas da podest. Circa 220 uffants da la regiun, dentant era da Livigno, èn da la partida tar il sprint d’uffants ch'i dat uss gia dapi quaranta onns.
Dal sprint d’uffants a medaglias olimpicas – sco Nadja Kälin
Numerusas atletas ed atlets da la regiun han fatg part al sprint d’uffants dal Maraton da skis engiadinais sias emprimas experientschas en la loipa. Il sprint vegn organisà dal Club da skis Piz Ot Samedan, nua che per exempel era Nadja Kälin, la victura da las medaglias d’argient e da bronz tar ils Gieus olimpics Milano Cortina 2026 ha emprendi il sport da passlung.
Er Nina Cantieni, che ha gudagnà la stagiun passada trais medaglias tar ils Gieus olimpics da giuventetgna a Bakuriani en Georgia, ha emprendì tar il Club da skis Piz Ot il sport da passlung. Er ella ha gia fatg part al sprint d’uffants. Uschia che giuvnas e giuvens che fan part al sprint d’uffants a Samedan san propi dir ch’els èn sin ils fastiz da futurs champiuns.