Els trais eran vegnids disqualifitgadas perquai ch'ins haja chattà fastizs da fluor vi dals skis. Quai ch'è scumandà. Sco che la FIS ha communitgà oz, hai dentant dà sbagls tar il test da fluor. Ins n'haja betg tegnì en il protocol da test. Las disqualificaziuns vegnan revocadas.
La Franzosa Maëlle Veyre è cun quai la «nova» victura dal maraton. Ella era arrivada a la finamira bunamain ina minuta pli sperta che Giuliana Werro. L'Engiadinaisa vegn cun quai spustada sin il segund plaz – il classament vegnia adattà. Las autras nov disqualificaziuns pervia da fluor vi dals skis valan dentant vinavant.
Responsabladad tar FIS
Sco ch'ils organisaturs dal maraton scrivan en ina communicaziun, na sajan els betg involvids en ils tests da fluor. Quai saja cumplettamain en ils mauns da la FIS. Ins deplorescha ch'ils sbagls sajan capitads. Gist envers las persunas disqualifitgadas hai dà critica e renfatschas diras. Ins haja chapientscha che quai na saja nagina situaziun leva.
Cun l'adattaziun dal classament n'hajan teoreticamain intginas dunnas nagin dretg pli sin ina summa da premi. Ins veglia dentant tuttina pajar quellas, ha decidì il comité d'organisaziun.
I dat critica
Tenor Adriano Iseppi, manader da la cursa al maraton, saja il comité d'organisaziun vegnì infurmà il glindesdi ch'i haja dà sbagls tar intgins tests. Els na sappian dentant betg tge ch'è capità en la tenda da test, quai saja lura la responsabladad da la FIS. Effectuadas èn uss passlunghists e passlunghistas, oravant tut Giuliana Werro. Adriano Iseppi haja telefonà ad ella e declerà la situaziun.
Per ella èsi ina dischillisiun sco che l'entir process è vegnì fatg. Ella stettia mal per tut las atletas ed er per l'organisaziun dal maraton.
Giuliana è consternida. Ella na chapescha betg il mund, sco er nus na chapin betg el.
Il comité d'organisaziun dal Maraton da skis engiadinais spetga uss da la FIS da sclerir il cas, da mussar si tge ch'è stà il problem. Sch'i saja stà in sbagl en il process da testar u sch'ils skis sajan stads schubers e cunquai senza fluor, quai saja uss l'incumbensa da la FIS, accentuescha Iseppi.
Accumulaziun da sbagls
La FIS ha medemamain piglià posiziun en chaussa. Michal Lamplot, schef da cursa per la sparta passlung, conceda ch'i haja dà ina seria da sbagls umans tar ils tests ch'èn lura resultads en pliras disqualificaziuns. El conferma vinavant ch'i n'haja vairamain dà naginas cumprovas da fluor sin ils skis da Maëlle Veyre, Silvan Durrer e Daniel Grätzer.
