Gia baud ha Gianna Eichholzer cumenzà cun il sport da passlung. L’emprim tar il Club da skiunz Sarsura a Zernez enfin a l’organisaziun Giuventetgna e Sport da Nordic Scuol fa ella passlung. La stagiun passada ha la giuvna da 14 onns anc gudagnà en sia categoria da vegliadetgna il sprint da giuventetgna en il rom dal Maraton da skis engiadinais. Quest enviern participescha Gianna Eichholzer per l’emprima giada a la cursa da dunnas.
En la medema cursa sco ils stars Johaug e Kowalczyk
Che il star norvegiais Therese Johaug dat ses comeback a la cursa da dunnas è stà ina gronda surpraisa. Er sche la passlunghista da classa che ha gudagnà tut quai ch'ins po gudagnar en quest sport, aveva gia studegià davart in pussaivel comeback, è la decisiun da dar quel en Engiadina stada ina surpaisa. Allegraivel per ils organisaturs è era il fatg che Justina Kowalczyk, er ella è campiunessa mundiala ed olimpica, turna suenter sia pausa da maternitad sin ils skis da passlung. Ensemen cun dunnas da quest caliber po la giuvna Gianna Eichholzer currer per l’emprima giada la cursa da las dunnas.
Simplamain avair plaschair e dar tut durant la cursa
La cursa da dunnas è per la giuvna passlunghista sia premiera. L’annunzia ha Gianna Eichholzer fatg magari spontan. Tuttina vul ella dar sin il traject da 17 kilometers da Samedan a S-chanf tut. Sa preparada spezialmain sin questa cursa na saja ella betg. Gia la sonda fa Gianna Eichholzer puspè part al sprint da giuventetgna ed il di suenter vul ella far la cursa da dunnas. Quai sin la medema loipa sco ils stars da quest sport, Johaug e Kowalczyk.