Tar il final da la cuppa mundiala da freestyle sin il Corvatsch ha Giulia Tanno manchentà il podest dal slopestyle be per in punct. Gudagnà la concurrenza ha la Franzosa Tess Ledeux, avant la Svizra Sarah Höfflin e la Norvegiaisa Johanne Killi. Mathilde Gremaud n’è betg stada da la partida, ella era cupitgada en la qualificaziun.
Tar ils umens ha il Svizzer Valentin Morel cuntanschì rang 13. Il Grischun Andri Ragettli e Fabian Bösch han mancà pervi da blessuras. Gudagnà ha il Svedais Jesper Tjäder, avant il Canadais Evan Mceachran ed il Norvegiais Birk Ruud.
Andrina Salis 6avla cun il snowboard
En la concurrenza slopestyle snowboard eran cun Andrina Salis ed Ariane Burri duas Svizras sa qualiftgadas per il final. La giuvna da 17 onns Andrina Salis è la finala daventada 6avla, sia collega d'equipa Ariane Burri 10avla. Gudagnà ha l'Americana Julia Marino, avant l'Australiana Tess Coady e l'Austriaca Anna Gasser.
Giubileum sin il Corvatsch
Gia per la dieschavla giada s’entaupa l’elita dal sport da freeski e da snowboard en Engiadina Auta. Sin il Corvatsch ha lieu per la dieschavla giada la cuppa mundiala da freestyle. Questa giada cumbattan las meglras atletas ed ils megliers atlets perfin per singulas cullas da cristal.
Avant las concurrenzas da la cuppa mundiala da freeski sin il Corvatsch na deva quai betg anc insatge sumegliant en Engiadina Auta. La regiun era per uschia dir ina regiun vergina quai che pertutga concurrenzas da la cuppa mundiala da freeski.
Cun las concurrenzas a Silvaplauna sin il Corvatsch han ins dentant midà quai. Davent da lura vegnan las meglras atletas ed atlets da questas disciplinas en Engiadina Auta e procuran per spectacul. Andri Ragettli per exempel ha gia mussà sin il Corvatsch ses talent e ses trics cun skis, ni er Mathilde Gremaud. Quest onn manchenta Ragettli dentant la concurrenza pervia d'ina blessura.
Cuppa mundiala sin il Corvatsch essenziala per ils campiunadis mundials
Gia dapi diesch onns s’entaupa l’elita dal mund da freestyle sin il Corvatsch. Dapi trais onns èn era las snowboardistas ed ils snowboardists da la partida. Uschia è l’eveniment a la fin da la stagiun creschì ad in eveniment preferì per las atletas e per ils atlets. Quai ha segir er gidà durant la candidatura per ils proxims campiunadis mundials. L’onn 2025 han quels lieu in Engiadina Auta. Ils emprims campiunadis mundials da quest gener da la regiun.
Rimnar experientschas per ils campiunadis mundials
Er l’ediziun da giubileum da la cuppa mundiala da freeski e da snowboard sin il Corvatsch duess purtar experientschas. Experientschas ch'ins sa alura duvrar per l’organisaziun dals proxims campiunadis mundials.
