Davent da l’entschatta era ì l’idea da l'UEFA da far in turnier en l’entira Europa. L’anteriur president Michel Platini vuleva uschia dar in rom adequat al turnier che festivescha quest onn ses giubileum da sessanta onns.
Citads da l’entira Europa ha sin quai inoltrà lur candidaturas sco lieu d’occurrenza da singulas partidas dal turnier da giubileum. La finala han alura indesch citads en indesch differents pajais da l’Europa ed a Baku en l'Asia survegnì glisch verda per organisar partidas da l’Euro da ballape.
Turnier cun aspectaturs e restricziuns
Pervia da la pandemia da corona èn las capacitads en ils differents stadions dentant reducì. Tar ils gieus a Sankt Petersburg en Russia ed a Baku en il Aserbaidschan èn lubids tschuncanta pertschient da las capacitads en ils stadions. A Minca dentant mo circa ventgadus pertschient da la capacitad maximala. Las capacitads en ils stadions sun vegnids definids da la UEFA ensemen cun ils singuls pajais.
Per il mument san ils fans era far viadi dad in lieu a l’auter. Ils viadis en dentant suttamess a las prescripziuns dals differents pajais. Fans da la naziunala svizra san per exempel far cun la naziunala svizra il viadi a Baku per las partidas cunter la Valisa e la Tirchia. Cun entrar en il Aserbaidschan ha ins da purtar cun sai in test negativ e far la dumonda per in visum. Ensemen cun il bigliet è ins exclus dad ina quarantina. Auter sch'ins vul far viadi en l’Italia. Era qua dovr’ins in test negativ. Per il mument vaglia dentant ina quarantina da tschintg dis.
Euforia anc betg gronda
Actualmain n'è il turnier anc betg uschia preschent. I mancan anc las bandieras ed ils fans che portan gia ils tricots da las differentas equipas.
Cun la partida d’avertura che vegn dentant adina pli datiers as savess quai anc midar. Ed alura egl vi da la naziunala svizra dad empizzir cun bunas prestaziuns il fieu per quest turnier. Las schanzas che l’equipa dal trenader Valdimir Petkovic sa questa giada dar il otgavel, ni perfin la partida da quart final en èn mintga cas intactas.