L'Englais
Ursin Lutz, oriund da Rabius, che abitescha a Domat è gia daditg in simpatistant e fan da l’equipa englaisa. E quai malgrà ch’el ha naginas ragischs sin l’insla. Avant radund 20 onns saja el stà en l’Engalterra per emprender englais. La cultura da quest pajais haja immediat tschaffà el.
La cultura cun ils pubs che vivan per il ballape, la glieud ed er la lingua han immediat fascinà mai.
En il final tranter l'Italia e l'Engalterra na spetga Ursin Lutz betg in spectacul. Segir è cha nagin vul ristgar damemia. El fissi dentant leds, sch'i na dessi betg puspè ina prolungaziun u ina lutga da penaltis. Gliez hai dà avunda durant quest turnier. El speria semplamain ch'ils Three Lions van per quest titel da campiun d'europa. Dapi il 1966 spetgan ils Englais sin in titel ad in turnier grond.
Il Talian
Serafin Lehmann da Sumvitg è gia dapi ch'èl è in giuven buob fan da l'Italia. Ragischs talianas n'ha el naginas. El sa regorda dentant anc daco ch'el ha cumenzà a sustegnair la Squadra Azzurra.
Cu jau hai cumenzà a dar ballape ha mia mamma cumprà in tricot da l'Italia. E dapi lura sundel jau fan dad els.
Il giuven, che dat era sez anc ballape, spera sin in bun final cun bleras acziuns offensivas sin omaduas varts. E natiralmein che ses Talians pon auzzar ad ault a la fin il buccal. Il 2006 ha l'Italia la davosa giada pudì triumfar ad in turnier grond. Numnadamain en il final dal campiunadi mundial.