Siglir tar il cuntegn

Header

cuntegn

EURO 2020 ils otgavelfinals Italia e Danemarc en quartfinals

L'Italia ha gudagnà cunter l'Austria cun 2:1 ed il Danemarc cun 4:0 cunter la Valisa.

En la partida tranter l'Austria e l'Italia en il stadion Wembley a Londra hai duvrà la prolungaziun. Suenter il temp regular steva quai 0:0. Tuts trais gols èn pia crudads en la prolungaziun.

L'Italia ch'ha persvas en la fasa da gruppa ha pir pudì evitar en la prolungaziun da betg crudar ora dal campiunadi europeic. Ils Talians han cunzunt gì fadia en la segunda mesadad dal gieu. En la prolungaziun han lura ils giugaders frestgs Federico Chiesa e Matteo Pessina fatg ils dus gols. Set minutas avant la fin ha lura medemamain in giugader frestg austriac, Sasa Kalajdzic scursanì sin il 2:1.

En il quartfinal frunta l'Italia u sin la Belgia u sin il Portugal.

La fin finala tanschi per l'Italia
Or da Sport-Clip dals 26.06.2021.

Danemarc cun 4:0 cunter Valisa

La squadra naziunala dal Danemarc ha battì la sonda saira ad Amsterdam en l'emprim gieu dals otgavelfinals la Valisa cun 4:0. Il Danemarc è uschia sa qualifitgà per ils quartfinals.

L'entschatta manava la Valisa anc il gieu, però senza far gols. L'emprim gol ha lura Kaspar Dolberg fatg anc avant pausa. Curt suenter pausa ha el fatg il segund gol. A partir da lura n'ha la Valisa betg pli pudì reagir. Joakim Maehle e Martin Braithwaite han curt avant la fin anc fatg ils ulteriurs dus gols.

Ils Danais fruntan ils 3 da fanadur a Baku u sin l'Ollanda u la Tschechia. Las duas squadras dattan questa dumengia a las 18:00 lur gieu dals otgavelfinals.

Ils Danais giubileschan suenter il 1:0 da Dolberg
Or da Sport-Clip dals 26.06.2021.

RTR novitads 20:00

Artitgels legids il pli savens

Scrollar a sanestra Scrollar a dretga