La Svizra frunta il gliendisdi en l'8avel final sin il campiun mundial, la Frantscha. Als Franzos ha in pari da 2:2 encunter il Portugal bastì per terminar la fasa da gruppa sin plazza 1. Sco gia savens ils ultims onns sa cruschan uschia las vias da la Svizra e la Frantscha en ina runda finala.
Tudestgs han stuì tremblar
Dasper il Portugal è er la Germania sa qualifitgada per la proxima runda. Ils Tudestgs han medemamain giugà in pari da 2:2 encunter ils Ungarais che sto uschia ir a chasa. Il team da Joachim Löw ha però stuì tremblar. Senza il segund gol en l'84avla minuta, fiss la fasa da gruppa stà la staziun finala.
Spagnols dumognan tuttina aunc il pass en la fasa da k.o.
Dasper la Svezia ch'era gia sa qualifitgada per l'8avel final ha er la Spagna dumagnà en la fasa da k.o. Ils Spagnols han battì cleramain la Slovachia cun 5 a 0 e termineschan uschia la fasa da gruppa sco secund. En l'ulteriura partida ha la Svezia battì la Pologna cun 3:2. Per ils Polacs ed ils Slovacs è il turnier a fin.