La sort ha decidì e procurà per ina gruppa betg nunpussaivla per la Svizra. La Germania è betg stada uschè bun en furma en la fasa da qualificaziun per l'Euro 2024. E Scozia ed Ungaria n'èn omadus betg equipas spezialmain fermas sin il plaz.
Ils 15 ed ils 19 da zercladur dat la Svizra a Cologna cunter l'Ungaria e la Scozia. Sin la Germania frunta ella ils 23 da zercladur a Francfurt.
Las gruppas B e D èn diras
En la D è la Frantscha, ils Pajais Bass, l'Austria ed in dals victurs dals playoffs. En la B è l'Italia, la Spagna, l'Albania e la Croazia. Tschellas gruppas èn plitost gulivas.
- C: Engalterra, Danemarc, Slovenia, Serbia
- E: Belgia, Rumenia, Slovachia, ulteriur victur da playoffs (u Israel, Bosnia-Erzegovina, Ucraina u Islanda)
- F: Portugal, Tirchia, Tschechia, ulteriur victur da playoffs (U Georgia, Grezia, Kasachstan u Luxemburg)
Ina situaziun da partenza averta
Cunter la Germania ha la Svizra giugà gia 53 giadas ed ha ina bilantscha cleramain negativa. L'ultima victoria svizra datescha dal matg 2012, cura che la Nati ha pudì decider in gieu da test per sasezza. En ina runda finala vegn l'inscunter dals dus pajais vischins però ad esser ina premiera.
Ils Scots èn sa classads en la qualificaziun davos la Spagna, ma avant la Norvegia cun ils top-stars Erling Haaland e Martin Ödegaard, sin rang 2. Fin als ultims 3 gieus è l'equipa stada en egl cun ils campiuns d'Europa dal 2008 e dal 2012.
En Scozia ha la Svizra tutgà gia en la fasa da gruppa da l'EM 1996 en l'Engalterra, lura ha il team dad Artur Jorge stuì suttacumber a 0:1.
L'Ungaria n'è betg vegnida battida en la gruppa G ed ha distanzià tranter auter la Serbia e Montenegro. Il pli grond num dal team da trenader talian Marco Rossi è il capitani Domini Szoboszlai ch'ha giugà dapi questa stagiun per Liverpool.
En il cader è er il defensur da Servette, Bendeguz Bolla. Er cunter ils Magiars ha la Svizra schon giugà ina giada ad in'occurenza gronda, dentant avant lung temp. A la cuppa mundiala en Frantscha ha la Nati perdì 0:2.