Per l’emprima giada insumma è la naziunala Svizra da ballape sa qualifitgada per in quartfinal d’ina Euro. Er il davos gieu da quartfinal tar in Campiunadi mundial è gia ditg enavos – anno 1954. Cun avanzar en questa runda ha l’equipa dal trenader Vladimir Petkovic pia scrit istorgia da sport svizra.
Success istoric lascha fraid ils fans
A St. Petersburg en Russia dat la Svizra la partida istorica. A la riva dal Mar da l’ost duai la naziunala procurar per il proxim grond success – quai dentant mo cun paucs fans svizzers. Mo var 1’000 dad els fan il viadi a St. Petersburg per esser live da la partida. Ils fans fan dentant pir al di dal gieu il viadi en Russia. Era ils fans da la Spagna na vesan anc betg en la metropola russa.
Corona, il giast betg envidà
Pervia da la situaziun actuala da corona na vegnan probablamain betg uschè blers fans a guardar il gieu en il stadion. Las cifras d’infecziuns cun il virus creschan per part puspè. Gist la mutaziun «delta» è ina sfida per ils organisaturs. Las cifras d’infecziun èn actualmain tar var 20’000 per di e questa cifra crescha vinavant. Per il mument na valian naginas restricziuns auter ch’il obligatori da mascra endadens. Quai savess dentant puspè sa midar. Suenter la partida dal quartfinal, cura che l’Euro è istorgia en Russia, savessi puspè vegnir pli sever.