Suenter be 6 minutas sajetta Haris Seferovic la Svizra en l'avantatg. Il 2:0 suanda en minuta 25 tras Xherdan Shaqiri. Suenter la pausa sajetta lura Kahveci in gol per la Tirchia, ma en minuta 68 sajetta Shaquiri in segund gol ed il terz per la Svizra.
Anc n'è la Svizra dentant betg cun garanzia en l'otgavelfinal. Els èn ils terzs en lur gruppa e pon anc adina daventar in dals quatter megliers sin plazza trais, che vegnan er vinavant.
Italia – Valisia 1:0
En l'ulteriur gieu da questa saira han dà la Valisia e l'Italia in encunter l'auter. L'Italia ha gudagnà la partida cun 1:0. Uschia èn l'Italia e la Valisia sin plazza in e dus da la gruppa A e cun quai directamain vinavant en l'otgavelfinal.
En il gieu da la Valisia e l'Italia hai dà ina carta cotschna. Quella ha incassà Ethan Ampadu. El è stà sin il pe da Bernadeschi. L'arbiter ha sinaquai reagì fitg svelt. Suenter han ils Valis stuì dar be en 10.
Avant il gieu
La squadra naziunala Svizra è stada sut squitsch. Suenter il pari encunter la Valisa e la clera sconfitta encunter l’Italia ha la Svizra gì mo in punct sin il conto. Uss grazia la victoria cunter la Tirchia han els quatter puncts. Pervi da la differenza da gols, è dentant la Valisia vinavant e la Svizra sto tremblar.
Anc betg sin segira en l'otgavelfinal
Las emprimas duas meglras equipas da mintga gruppa fan il pass en l'otgavelfinal. En la gruppa da la Svizra, la gruppa A, èn l’Italia e la Valisia segir vinavant. Era da la partida en la fasa decisiva dal turnier èn las quatter meglras equipas ch'èn rangadas sin plazza trais.
Tirchia na vul bandunar il turnier senza in solit punct
Er per la Tirchia èsi ì per bler en la davosa partida da gruppa. Suenter duas partidas persas avevan els gnanc in solit gol. La bilantscha magra per la Tirchia. Dumengia dentant han els almain pudì far in gol, uschia na ston els betg turnar cun ina nulla sin il conto.
