Igl è stà l’emprima medaglia nordica per las dunnas dapi la medaglia da bronz dad Evi Kratzer avant 34 onns. D’ina medaglia siemia il duo svizzer uss er dals gieus olimpics a Peking.
Ils gieus olimpics d’enviern il favrer 2022 a Peking è il punct culminant da la stagiun da passlung che cumenza la fin d’emna dals 26–28 da november a Ruka en la regiun da Kuusamo en Finlanda. Igl è er gist la davosa stagiun nua che nus vegnin a vesair il duo svizzer communablamain a la partenza. Laurien van der Graaff da Tavau vegn numnadamain a terminar sia carriera la primavaira, quai en la vegliadetgna da 34 onns.
Dus trumfs da sprint
La stagiun 2021/22 na duai dentant betg esser ina stagiun u turnea da cumià. Ella vegnia a cumbatter fin il davos di, uschia Laurien van der Graaff che fa part al cader naziunal dapi il 2006 e ch’ha dà ses debut en la cuppa mundiala il 2008. Fin oz ha ella gudagnà trais cursas da la cuppa mundiala, tranter auter er il sprint d’equipa ensemen cun Nadine Fähndrich avant bun in onn a Dresden en Germania. Il di avant aveva la Lucernaisa gia gudagnà il sprint singul en il stil liber ed uschia festivà sia emprima victoria da la cuppa mundiala. Sin il pli tard dapi lura audan tant van der Graaff sco er Fähndrich tar las meglras spezialistas da sprint da la cuppa mundiala.
Las duas passlungistas svizras sa chapeschan fitg bain, er sper la loipa, e quai malgrà ch’ellas èn duas fitg differentas. Mo forsa constettia la chemia uschè bain gist perquai ch’ellas sajan uschè differentas dian Fähndrich e van der Graff, ils dus gronds trumfs svizzers da passlung per questa stagiun olimpica.