Siglir tar il cuntegn

Header

Visualisaziun nov campus FHGR.
Legenda: Il nov center da la federaziun svizra da ballape pudess vegnir integrà en il campus da la FHGR, che vegn realisà enfin il 2027. DEPARTAMENT D'INFRASTRUCTURA, ENERGIA E MOBILITAD
cuntegn

Federaziun da ballape svizra Cuira en la cursa per daventar center naziunal

Il center duai porscher plazzas da trenament per tut las equipas naziunalas sco era la sedia uffiziala da la federaziun. En la cursa per daventar il center è era la citad da Cuira.

Il nov center che vegn numnà «Home of Swiss Football» duai custar 35 enfin 50 milliuns francs e gia esser pront l’onn 2027. Suenter ina preselecziun èn anc Cuira, Cham e Muntelier en la cursa. Quai tenor infurmaziuns da SRF.

A Cuira vegniss nizzegiada l’infrastructura sportiva sin l’areal da l’Obere Au. Tut tenor las pretensiuns da la federaziun stuess questa dentant anc vegnida schlargiada. Plinavant è planisà d’integrar l’infrastructura per la sedia da la federaziun en il campus da la scol’auta spezialisada FHGR. Quest campus è gia planisà e vegn realisà enfin il 2027. Quai è pia il medem plan da temp sco la federaziun da ballape svizra ha. Mo ch’ils plans da la FHGR èn gia bler pli concrets e stattan curt avant la realisaziun.

Tar nus pudessan ins cuntanscher spert insatge, ins pudess profitar da l’infrastructura existenta e cumpletar questa a moda ideala.
Autur: Urs Marti president da la citad da Cuira

Era gia planisà è da bajegiar entras la citad da Cuira è ina nova halla d’events sin l’areal da l’Obere Au. Era questa pudess eventual giugar ina rolla tar il nov campus da la federaziun da ballape. Tant il president da la citad da Cuira Urs Marti sco era il president da l’uniun da ballape grischuna Claus Caluori èn da l’avis ch’i è in avantatg, ch’ins pudess nizzegiar a Cuira blera infrastructura ch’è gia avant maun ubain planisada.

audio
Cuira è ina da las citads che vegnan en dumonda per il center dal SFV
ord Actualitad dals 14.09.2023. Maletg: FHGR
laschar ir. Durada: 3 minutas 12 Secundas.

Anc trais lieus en la cursa

A Muntelier en il chantun da Friburg vegniss tut l’infrastructura bajegiada da nov. Cun il temp da realisaziun enfin il 2027 pudess quai esser in plan ambizius. A Cham vegniss per part nizzegià l’infrastructura existenta e per part construì da nov. Là pudess il dischavantatg esser, che las plazzas da ballape ston vegnir partidas cun il club da ballape local.

Jau suppon che las investiziuns per la federaziun svizra fissan las pli bassas a Cuira.
Autur: Urs Marti president da la citad da Cuira

En il mument vegnan tenor SRF evaluadas las pussibilitads en ils differents lieus, actualmain surtut a Muntelier. Cura ch’i dat las emprimas decisiuns n’è il mument betg enconuschent.

RTR actualitad 12:00

Artitgels legids il pli savens

Scrollar a sanestra Scrollar a dretga