Siglir tar il cuntegn

Header

audio
Ina fin d'emna intensiva per Claudio Cadonau
Or da Actualitad dals 10.05.2021.
laschar ir. Durada: 03:08 minutas.
cuntegn

Festa campiun svizzer cun Zug Ina fin d'emna intensiva per Claudio Cadonau

Per la segunda giada en sia carriera è il giugader Rumantsch vegnì campiun svizzer en il hockey sin glatsch. Il 2008 ha el cun 19 onns gia pudì gudagnar la trofea cun ils ZSC Lions. Ils dus titels na sajan dentant betg da cumparegliar, di il defensur cun ragischs a Vuorz.

Igl è stà in titel che tuts hajan spetgà dad els, gist perquai èsi in titel cun ina enorma valita, di il defensur da Zug cun ragischs en Surselva (Vuorz). Igl EV Zug ha dominà la qualificaziun ed è uschia stà il grond favurit sin il titel da campiun svizzer. Tut auter ch'il titel fiss stà ina trumpada.

Igl è impressiunant co nus essan ids enturn cun il squitsch.
Autur: Claudio Cadonau defensur dal EV Zug

Claudio Cadonau è stà ina pitga constanta durant l'entira stagiun. El è stà sin il glatsch durant 50 gieus da qualificaziun e durant 10 gieus en ils playoffs. Per el èsi gia stà il segund titel da campiun svizzer. Il 2008 ha el cun 19 onns gia pudì gudagnar la trofea cun ils ZSC Lions. Il titel da quest onn haja dentant tut in'autra muntada. El haja gì tut in'autra rolla ed è stà giugader da tschep. Tar il titel cun ils ZSC Lions ha Claudio Cadonau mo dà 13 gieus durant l'entira stagiun.

Il defensur cun la numera 34
Legenda: Il defensur cun la numera 34 Per Claudio Cadonau èsi il segund titel da campiun svizzer en sia carriera. Keystone

I è vegnì fatg festa, er senza fans

L'equipa dal EV Zug mira enavos sin ina fin d'emna intensiva. Venderdi han els gudagnà il titel da campiun svizzer e suenter ha la festa cumenzà, er senza fans e senza gronda parada tras la citad. La notg sin sonda hajan els fatg festa ensemen cun amitgas e dunnas.

La sonda endamaun cu jau sun vegnì neunavon en cabina e hai legì ils sms ch'jau hai survegnì, hai realisà che nus essan campiun svizzer
Autur: Claudio Cadonau defensur dal EV Zug

La sonda ha la fiasta cuntinuà, raquinta Claudio Cadonau. L'entira equipa è puspè s'inscuntrada ed è ida ensemen a gentar. Suenter sajan els anc ir cun il buccal a spass atras la citad per preschentar el a la glieud sin via.

La dumengia è lu stà per l'entira equipa il di da ruassar. Il di nua che mintga giugader u trenader ha giudì sin sia moda e maniera il titel da campiun svizzer.

RTR actualitad 17:00

Artitgels legids il pli savens

Scrollar a sanestra Scrollar a dretga