In final cun blers puncts culminants
Ils dus lutgaders n'han regalà nagut in a l'auter. Omadus han cumbattì activamain. Il lutgader da Maiavilla ha dentant prendì in pau bler ristg e quai ha il magister da sport da Meiringen, Matthias Glarner nizzegià. Suenter 13 minutas e 30 secundas è il nov retg da lutga stà tschernì: Glarner Matthias.
Suenter la setavla runda
Armon Orlik sa chatta suenter 7 lutgas sin il segund plaz e frunta en la lutga finala sin il Bernais Matthias Glarner ch’ha batti en la 7avla lutga Mario Thürig. Il victur dal duel Orlik – Glarner è il nov retg da lutga e successur da Matthias Sempach ch’ha triumfà il 2013 a Burgdorf.
Gudogna Armon Orlik la lutga finala fiss il lutgader da 21 onns l’emprim Grischun che daventass retg da lutga.
Reacziuns suenter la lutga finala
Orlik gudogna er cler sia 6avla lutga
Armon Orlik ha danovamain mussà ina prestaziun da vaglia. Cun ses pe ha el fatg vegnir Patrick Räbmatter ord l'equiliber e lura ha Orlik pudì smatgar en il resgim l'um da 153 kilos.
Armon Orlik è suenter 6 lutgas sin il segund plaz, 0.25 puncts davos il Bernais Matthias Glarner. Samuel Giger e David Schmid han sco terzs gia in mez punct retard sin Orlik. En la 7avla lutga frunta Armon Orlik sin David Schmid. Il victur da quest duel è en la lutga finala. Il leader Matthias Glarner cumbatta cunter Mario Thürig.
Il retg Matthias Sempach franà
En la 6avla lutga èn gist plirs cunfavurits vegnids franads, tranter auter er il retg da lutga Matthias Sempach ch’ha stuì sa cuntentar cun in pari cunter Sven Schurtenberger. Er be in pari hai dà tranter Daniel Bösch e Christian Stucki sco er tranter Remo Käser e Christian Schuler.
Beat Clopath cun 9 puncts ord in pari
Il segund meglier Grischun, Beat Clopath da Panaduz ha fatg in pari cunter Werner Suppiger. Per ses engaschament pli activ ha Clopath survegnì 9 puncts. En tut vegn el uss sin 56,50 puncts. En l'emprima lutga da la dumengia era Clopath fruntà sin ina dira nusch. En la 5avla runda cunter Christian Stucki, in dals cunfavurits per il titel, ha Clopath dentant tegnì pitg e cuntanschì in pari.
Stucki ord il cumbat per il titel
Suenter 5 lutgas figurescha in quartet a la testa cun 48,75 da maximal 50 puncts. Sper il Grischun Armon Orlik èn quai Matthias Glarner, Remo Käser e Daniel Bösch. Sin ils chaltgogns da quai quartet èn tschintg lutgaders cun be in quart punct pli pauc sin il conto, tranter quels er il retg actual Matthias Sempach e Christian Schuler da la Svizra Centrala.
Ord il cumbat per il titel da retg da lutga è Christian Stucki ha stuì sa cuntentar cun in pari cunter Beat Clopath da Panaduz. Clopath è uschia sin buna via da gudagnar ses terz cranz ad in festa da lutga federala.
Sin Orlik spetga in ulteriur Bernais
En la 5avla lutga, l’emprima al segund di da la festa federala ad Estavayer, frunta il trumf grischun Armon Orlik sin Matthias Siegenthaler. Quai è gia il quart adversari Bernais per il giuven lutgader da Maiavilla.
Duel brisant
Cun Matthias Siegenthaler frunta Armon Orlik sin in lutgader ch’ha actualmain tuttina blers puncts sin il conto. Quel che perda pia quest duel pudess crudar ord la decisiun en il cumbat per il titel da retg da lutga.
Il trenader dals Grischuns, Reto Attenhofer è cuntent cun l'emprim di da la lutga federala. Ses lutgaders hajan mussà ch'els possian tegnair la pitga envers ils auters.
-
Bild 1 von 16. David Schmid è stà ina greva nusch per Armon Orlik. Bildquelle: Keystone.
-
Bild 2 von 16. Cun in'unda engrazia Orlik al publicum per il sustegn. Bildquelle: Keystone.
-
Bild 3 von 16. Er cun Räbmatter fa Armon Orlik curt process. Bildquelle: swiss-image.
-
Bild 4 von 16. Matthias Sempach ha dumagnà en il resgim ses cunfavurit Armon Orlik. Bildquelle: Keystone.
-
Bild 5 von 16. Armon Orlik ha gudagnà trais da las quatter lutgas dad oz. Bildquelle: swiss-image.
-
Bild 6 von 16. Armon Orlik suenter sia victoria cunter Bernhard Kämpf. Bildquelle: Keystone.
-
Bild 7 von 16. Curdin Orlik, il frar vegl da Armon, batta Peter Elsener. Bildquelle: swiss-image.
-
Bild 8 von 16. La tatta dad Armon e Curdin Orlik persequitescha la lutga plain fevra en la televisiun. Bildquelle: RTR, Gian Carlo Candinas.
-
Bild 9 von 16. Er il tat dals frars Orliks guarda plain tensiun sin la televisiun. Bildquelle: RTR, Gian Carlo Candinas.
-
Bild 10 von 16. Orlik ha dominà la lutga cunter Wenger. Bildquelle: swiss-image.
-
Bild 11 von 16. Armon Orlik ha fatg squitsch davent da l'entschatta. Bildquelle: swiss-image.
-
Bild 12 von 16. Armon Orlik, il dominatur actual. Bildquelle: Keystone.
-
Bild 13 von 16. Armon Orlik suenter la victoria cunter Kilian Wenger. Bildquelle: SRF.
-
Bild 14 von 16. Posa da victoria - Armon Orlik suenter ch'el ha battì Kilian Wenger. Bildquelle: Keystone.
-
Bild 15 von 16. Il lutgader Mike Muellestein dumogna Martin Glaus. Bildquelle: swiss-image.ch.
-
Bild 16 von 16. Entrada dals lutgaders en la «Arene de la Broye». Bildquelle: swiss-image.ch.