Gia en l’emprima lutga la damaun avevan ils frars Orlik cumbattì pari. Silsuenter han omadus gudagnà quatter lutgas en seria ed uschia cuntanschì meritadamain la lutga finala.
Armon Orlik, ch’ha gia triumfà otg giadas a questa lutga da chasa, avess però stuì batter ses frar en la lutga finala per defender ses titel dal 2025 a Cazas. Quai n’è betg grategià. Uschia ha Curdin Orlik triumfà cun in quart punct avant Armon Orlik ed in mez punct avant Ramon Betschart e Josias Müller ch'han terminà la festa da primavaira sin il terz plaz.
Ils frars Armon e Curdin Orlik èn stads ils gronds favurits a questa festa, era suenter che Christian Biäsch da Tavau ha stuì dar forfait pervia d’ina blessura. Tut en tut èn bunamain 60 lutgaders sa mess en il resgim a Vaz Sut, quai davant radund 1'350 aspectaturas ed aspectaturs. La festa da primavaira è vegnida organisada dal Club da lutga Unterlandquart.