Siglir tar il cuntegn

Header

cuntegn

Festa federala da lutga Corsin Jörger fa er part da la delegaziun grischuna

La delegaziun grischuna po ir cun tschintg lutgaders a Pratteln: Sper Armon Orlik èn Roman Hochholdinger da Favugn, Marc e Corsin Jörger da Domat e Christian Biäsch da Tavau Sertig vegnids selecziunads da la Federaziun da la Svizra dal Nordost.

Uss èsi definitiv: La delegaziun grischuna po ir cun tschintg lutgaders a la festa federala a Pratteln. Er Corsin Jörger, ch'era fin qua lutgader da reserva, ha survegnì glisch verda per far part a la festa. Il lutgader da Domat figurescha uschia en la delegaziun grischuna ensemen cun ses frar Marc Jörger, Armon Orlik da Maiavilla, Roman Hochholdinger da Favugn e Chrisian Biäsch da Tavau.

Sper quest quintet vuleva il manader tecnic Stefan Fausch er prender Sandro Schlegel a la festa. En tut ha la Federaziun da la Svizra dal Nordost selecziunà 66 lutgaders. Totalmain vegnan spetgads da quai da 270 lutgaders a Pratteln.

Leader Armon Orlik

Il meglier lutgader grischun dals ultims onns è senza dubi Armon Orlik. Il lutgader da Maiavilla vegn era questa giada ad esser il leader da l’equipa grischuna. El è er in dals pli ferms da l’equipa dal NOS cun schanzas intactas da cumbatter per il titel dal retg da lutga. L’onn 2016 tar la festa federala ad Estavayer era il grischun gia ina giada datiers a la curunaziun da sia carriera. Alura era Orlik en la lutga finala, quella ha il Grischun dentant pers cunter Matthias Glarner.

audio
Stefan Fausch davart ils lutgaders grischuns che van a Pratteln
ord Actualitad dals 08.08.2022.
laschar ir. Durada: 3 minutas 14 Secundas.

RTR actualitad 17:00

Artitgels legids il pli savens