Suenter 65 minutas plain tensiun stevi 2:2 en in gieu fitg guliv. Alex Formenton ha tutgà duas giadas en il temp regular per Ambri-Piotta. David Tomasek e Roman Horak han sajettà ils gols per l'equipa da la Tschechia.
Tar la segunda participaziun gudogna l'equipa da la Leventina pia per l'emprima giada la Cuppa Spengler. Cun quatter victorias en quatter gieus è il triumf pli che mo merità. Ambri-Piotta è l'emprima equipa svizra che gudogna il turnier da tradiziun dapi Genevra-Servette il 2014.
Plirs garants per la victoria
Encunter ina ferma equipa da Sparta Prag han plirs giugaders d'Ambri mussà prestaziuns extraordinarias. Il goli Janne Juvonen ha persvas cun pliras paradas grondiusas, er en la lutga da penaltis. Dils giugaders è Alex Formenton stà la gronda figura. Er sper ses dus gols è il Canadais da 23 onns stà la persuna che ha dà en il tact tar Ambri.
Ambri cun in fitg ferm turnier.
Las prestaziuns d'Ambri-Piotta a la Cuppa Spengler fan impressiun. Sco emprim la victoria da 5:2 encunter Örebro, lura il 7:3 encunter IFK Helsinki. En il mezfinal hani laschà al HCD nagina schanza e gudagnà cun 5:0. L'equipa da la Leventina è en in veritabel flow durant questa Cuppa Spengler.
Prag ha demonstrà sia classa
Il medem pon ins dentant era dir da l'adversari Sparta Prag. Ils Tschecs han l'emprim di battì il Team Canada cun 3:2, lura la gala da 9:2 encunter il HCD. En il mezfinal han els lura realisà ina victoria spectaculara da 4:3 cunter Örebro, suenter esser stà 0:3 en retard.
