Il favurit ha gudagnà tar las dunnas
Dapi il 2010 è l'equipa da Tusaun Cazas adina stada en il final da la Cuppa grischuna. Dal 2015 fin il 2019 ha il club triumfà tschintg giadas en seria. Era quest onn è l'equipa da 2. liga stada il cler favorit en il final. Che Tusaun Cazas è en furma mussa era il fatg che l'equipa è anc adina en la cursa per far la promoziun en 1. liga. L'adversari Cuira dat perencunter en 3. liga e avess duvrà ina pitschna sensaziun per triumfar en il final da la cuppa grischuna.
Segund titel per Valposchiavo Calcio
Il final dals umens ha gudagnà Valposchiavo. Quai grazia da in 2:1 cunter Moesa. Poschiavo ha gudagnà il 2015 la Cuppa grischuna ed è stà il 2013 ed il 2017 en il final. Moesa ha fatg il 2018 e 2019 il sigl en il final, nua ch'els han mintgamai pers cunter Cuira.
En il Grischun na datti nagina equipa ch'è durant la stagiun pli bler da viadi che Valposchiavo Calcio. Per ils gieus en 3. liga fan els viadis en l'entir Grischun, en il chantun Son Gagl e Glaruna. Dapi onns è l'equipa dal sid dal chantun in'equipa etablida en 3. liga. Els èn enconuschents tar ils adversaris sco team fitg ferm a chasa e lura era sco adversari malempernaivel, zai e pulit emoziunal.
La AS Moesa n'è perencunter betg fitg enconuschenta en il Grischun. L'equipa da la Mesolcina dat numnadamain campiunadi cun la federaziun da ballape dal Tessin. Er els èn gia dapi onns in'equipa da tschep en 3. liga. Questa stagiun cumbattan els perencunter cunter la relegaziun. En 24 gieus ha Moesa mo recaltgà 7 puncts.
In'equipa ch'è sa mesirada questa stagiun cunter Moesa è il CB Schlarigna. En la segunda runda da la Cuppa grischuna han els pers cun 0:4 cunter l'equipa dal Mesauc. I saja in'equipa fitg rutinada che dettia in ballape fitg clever. I na saja dentant betg in'equipa emoziunala sco Valposchiavo Calcio.
