La squadra dals umens da Tusaun/Cazas ha gudagnà il final cunter Landquart cun 1:0. Il sulet gol da la partida ha Vendim Gashi sajettà en la 31avla minuta. Tusaun/Cazas ha stuì dar a partir da la 54avla minuta cun in giugader pli pauc suenter ina carta cotschna. Tuttina èn els vegnids da salvar il 1:0 sur il temp.
Tusaun/Cazas è uschia successur da Cuira 97 II ch'aveva gudagnà il 2019 la cuppa grischuna. Il 2020 n'hai dà nagin victur pervia da la pandemia da corona.
Tar las dunnas na va il buccal suenter onns da success, per ina giada, betg a Tusaun. En in final dramatic cunter Domat muntava il resultat suenter 120 minutas ad 1:1. En la lutga da penaltis han las dunnas da Domat lur gì la meglra fin.