Malgrà che l'Engiadinaisa ha pir 22 onns, è ella gia blers onns activa en la cuppa mundiala. Il pass en l'elita mundiala è dentant grategià pir quest enviern. Duas giadas ha ella fatg il sigl sin il podest. Il december è ella vegnida terza a la cursa da chasa ad Arosa, ed il schaner ad Idre Fjäll (Svezia) è ella medemamain vegnida terza. Persvas ha Talina Gantenbein era als campiunadis mundials, nua ch'ella è ida sin plazza 4.
Questa stagiun è stada sco il cumenzament d'ina buna carriera
Las ultimas stagiuns n'eran betg idas tenor giavisch da l'atleta da Scuol. Plazzas da podest en la cuppa mundiala eran lunsch davent. Las prestaziuns stagnavan. Suenter la stagiun 2019/2020 ha ella perquai mess en dumonda inqual chaussa. La stad ha l'atleta da Scuol absolvì la scola da recruta per sportistas e sportists d'elita a Magglingen. La haja ella profità da fitg bunas cundiziuns da trenament, explitgescha Talina Gantenbein.
Jau ma sentiva fitg lucca suenter la recruta e na fascheva betg memia blers patratgs. Quai ma ha gidà.
Spezialmain durant l'emprima mesadad da la stagiun 2020/2021 ha l'Engiadinaisa profità da la buna preparaziun. Envers la fin da l'enviern saja ella vegnida in zic stancla. Perquai n'èn er ils resultats en las ultimas cursas betg pli stads optimals.
La giuvna da 22 onns guardà tuttina enavos sin sia meglra stagiun en la cuppa mundiala fin qua. Igl è stà la stagiun nua che Talina Gantenbein ha chattà il recept per esser tranter las meglras skiunzas en il sport da skicross.
Ed uschia èn era sias finamiras per il futur sa midadas. La gronda finamira per la proxima stagiun èn ils gieus olimpics a Peking. La stagiun passada haja mussà ch'il sigl sin podest è pussaivel.