-
Bild 1 von 4. Stuccas durant gieus olimpics. Franco Cavegn als gieus olimpics a Nagano il 1998 ensemen cun Didier Cuche. Bildquelle: Keystone.
-
Bild 2 von 4. Naginas medaglias ad eveniments gronds. Plazza 6 al campiunadi mundial a Sestriere il 1997 è stà ses meglier resultat ad in eveniment grond. Bildquelle: Keystone.
-
Bild 3 von 4. Gieus olimpics a Salt Lake City il 2002. Franco Cavegn è stà da la partida a trais gieus olimpics. Bildquelle: Keystone.
-
Bild 4 von 4. Legendar dress da chaschiel. Franco Cavegn ha er gì dad ir cursas en il dress da chaschiel. Bildquelle: Keystone.
Enturn Franco Cavegn èsi vegnì ruassaivel dapi ch'el ha terminà sia carriera il 2005. L'anteriur skiunz da Vella n'è betg pli da chattar en il circus da skis. Suenter sia carriera activa è el ì sia atgna via. Oz maina el la firma «Franco Cavegn events». Franco Cavegn che abita a Maiavilla offerescha viadis d'aventura sin il champ da carving, dad ir en naiv entira, heliskiing u da dar golf – saja quai en Svizra, en ils Stadis Unids u en il Canada.
Dus plazs da podest
Franco Cavegn è durant sia carriera stà activ en las disciplinas spertas. Surtut en la cursa rapida ha è el tutgà sur onns tar l'elita mundiala. Sia staila è ida si il 1994 a Kitzbühel, nua che Cavegn è surprendentamain vegnì tschintgavel cun il numer da partenza 36.
Duas giadas ha il Sursilvan fatg il pass sin il podest. Il 2001 è el vegnì terz a Garmisch ed il 2002 medemamain terz a Kvitfjell. Sia meglra stagiun ha el gì il 2001/2002. En sis cursas è Franco Cavegn stà classà tranter ils megliers 10. A la fin da la stagiun è el stà il quart meglier skiunz en la cursa rapida.
Durant sia carriera è il Lumnezian arrivà en 35 cursas tranter ils top 10. Per in plaz sisum il podest hai dentant mai tanschì durant ils 16 onns da sia carriera.
Blessuras han franà il Lumnezian
Il 1989 ha il skiunz dà ses debut en la cuppa mundiala a Sestriere. Sia carriera è deplorablamain era vegnida accumpagnada da grevas blessuras. Duas rupturas dal liom cruschà han adina puspè bittà enavos il Grischun. Blessuras èn era stadas il motiv, pertge che l'atlet da Vella ha terminà sia carriera il 2005. Tenor Franco Cavegn èn blessuras dentant insatge che tutgan simplamain tar la vita d'in skiunz.
Ord l'archiv: