La passiun per ir cun skis è naschida tar ils frars Nicola e Gian Andri Bolinger da Zuoz cura ch’els eran anc mats. Il pli gugent gievan els cun ils skis, ed anc pli gugent siglivan els sur schanzas ed obstachels. In ha dà l’auter ed ussa èn els en l’equipa Challenger da Swiss Ski. Quai è ina equipa che pussibilitescha a giuvens talents da profitar da lur savida e da lur pussaivladads da trenament.
Nus avain cumenzà cun in di l’emna trenament, lura cun trais dis trenament ed adina dapli.
Stagiun pulita per Nicola Bolinger, buna stagiun per Gian Andri Bolinger
Omadus frars Bolinger fan per gronda part cursas sin livel da la cuppa d’Europa. Durant l’enviern che va a fin ha Nicola Bolinger fatg ina giada il sigl sin il podest. Tar la cursa da slopestyle a La Clusaz è el vegnì segund. Ultra da quai ha el pudì festivar diversas plazzas da top sis. La stagiun da Gian Andri Bolinger era percunter stupenta. Il giuven da 18 onns ha gudagnà per l’emprima giada en sia carriera ina cursa da la cuppa d’Europa en il slopestyle. E tar la concurrenza da Big Air a Tavau è el vegnì segund.
Anc ina giada mussar bunas prestaziuns
Tar las concurrenzas da chasa vulan ins adina far ina buna figura. Uschia er ils frars Bolinger tar il campiunadi svizzer da freeski sin il Corvatsch. Per Gian Andri vai ultra da quai anc per ina bun resultat en il Big Air. Quai fiss surtut impurtant per sia rangaziun en il classament general.
