Siglir tar il cuntegn

Header

video
Andri Ragettli al Laax Open
Or da Telesguard dals 20.01.2023.
laschar ir. Durada: 3 minutas 15 Secundas.
cuntegn

Freeski Andri Ragettli vul far furora avant isch-chasa

Per l'emprima giada insumma èn er ils freeskiers da la partida al Laax Open. Per l'atlet da Flem, Andri Ragettli èsi in event tut spezial. Anc mài è el stà en acziun uschè datiers da ses dachasa.

Andri Ragettli è senza dubi il star dal Laax Open 2023. Il matadur local enconuscha la naiv ed ils sigls sin il Crap Sogn Gion sco strusch in'auter. Uras ed uras ha el trenà e filà vi da ses trics sin quest culm.

Nus avain gia gì cursas da cuppa mundiala a Silvaplauna ed a Cuira. Quai èn gia stadas cursas da chasa. Ma Laax è anc ina giada pli fitg in dachasa per mai.
Autur: Andri Ragettli skiunz da freestyle

Uschè datiers a ses dachasa a Flem ch'el sa perfin durmir quest'emna a chasa. Quai saja dad ina vart natiralmain fitg bel, ma da l'autra vart saja er impurtant ch'el na perdia la fevra da concurrenza. Sch'ins è bler a chasa saja quai in privel.

Ma natiralmain giauda Andri Ragettli da mussar dumengia ses megliers trics avant «ses fans», sumegliant sco quai ch'igl è gia stà il cas a Cuira. Al Big Air Cuira l'october passà è l'atlet da 24 onns vegnì quart. Finamiras concretas per il Laax Open na vul el betg tradir. Ma cler è che Andri Ragettli tutga en la disciplina da Slopestyle, sco actual campiun mundial, tar in dals topfavurits

audio
Andri Ragettli cumbatta a Laax
ord Actualitad dals 20.01.2023. Maletg: RTR
laschar ir. Durada: 2 minutas 37 Secundas.

Premiera per ils freeskiers

Ch'ils freeskiers èn per l'emprima giada da la partida al Laax Open è fitg spezial per l'entira scena. I saja dentant stà uras, manegia Andri Ragettli.

Er ils snowboardists han crai plaschair che nus essan uss er ina giada qua.
Autur: Andri Ragettli skiunz da Flem

Laax haja er tar tut ils freeskiers in fitg bun image, menziuna l'atlet da Flem. Tuts enconuschan quest parc e la muntada sa mussa er che tuts sajan da la partida al Laax Open 2023. Quai malgrà ch'ils X Games èn gia l'emna proxima. L'event ad Aspen (Stadis Unids) è ina da las pli impurtantas concurrenzas da freeski insumma.

RTR actualitad 17:00

Artitgels legids il pli savens

Scrollar a sanestra Scrollar a dretga