Per il Club da hockey da Tavau èsi ina dira terrada: perder il 7avel gieu dals finals dals playoffs en la prolungaziun – e quai anc avant ils fans da chasa. Cler, che quai fa mal. Per Friburg èsi dentant er in titel merità. Ditg ha l'equipa friburgaisa siemià da l'emprim titel. E bun in onn suenter lur victoria a la cuppa Spengler a Tavau, pon els celebrar qua lur emprim titel da campiun svizzer.
La seria dal final è dentant stada in vair spectacul – e fitg stretga. Quatter da las set partidas encunter Friburg-Gottéron è vegnida decidida en la prolungaziun. A la fin han finessas ed er in pau fortuna procurà per la decisiun. Tavau ha dà tut, mussà in ferm gieu ed ha pudì gulivar in retard da 0:2. Be per il gol decisiv n'hai betg bastà. Il 32avel titel sto pia anc spetgar.
Davyd Barandun avess gugent bandunà Tavau sco campiun svizzer
Consternà suenter la sconfitta è er il defensur Davyd Barandun: «Nagut... en il chau èsi stà vid», di el gist suenter la decisiun. Per l'unic Rumantsch en las retschas dal HCD èsi stà l'ultim gieu per Tavau. Gugent avess el bandunà Tavau sco campiun svizzer.
Nus avevan nossas schanzas, la morala era buna. Ma uschè è il hockey: mintgatant gudognan ins, mintgatant perdan ins.
Suenter 10 onns banduna el il HCD per giugar proxima stagiun cun l'SC Berna. Cun quel temp èn colliadas bleras regurdanzas ed amicizias. Da tut quest temp restia blera roba positiva, intgina chaussa negativa e surtut ina massa ch'el haja pudì emprender. «Tavau è segir daventà in pau in segund dachasa», uschia Davyd Barandun.
Nagin'encurunaziun suenter ina stagiun ferma
Per il HCD na datti pia nagina encurunaziun suenter ina stagiun da hockey ferma. La qualificaziun è stada datiers a la perfecziun. 39 da 52 gieus ha il HCD gudagnà e la concurrenza han els distanzià per 17 e dapli puncts. Durant l’entira qualificaziun n’hai strusch dà muments da flaivlezza tar Tavau. Davent da la bell’entschatta èn els stads da chattar sin plaz 1.
Tuttina, per il HCD cun coach Josh Holden va a fin ina stagiun extraordinara. Da menziunar èn spezialmain ils giugaders esters enturn Matej Stransky e Filip Zadina ch’èn stads immens dominants. Ed in grond pass enavant ha er la segunda garda fatg. Per exempel il defensur engiadinais Davyd Barandun che ha durant l'entira stagiun dà fitg constant, u er Yanick Frehner da Favugn che ha cun ses 12 gols sajettà tants gols sco anc mai.
Per leger suenter: il ticker cun tut ils resultats da la stagiun
Themen in diesem Newsticker
- Friburg emprima giada campiun svizzer
- Uschia è l'atmosfera var 2 uras avant il gieu decisiv
- In ultim saut per Barandun en il tricot da Tavau
- Victoria per Friburg: Decisiun croda gievgia
- Prevista: Tavau stat avant ses 32avel titel
- Tensiun era davos la culissa
- HCD gudogna a chasa e maina en la seria
- HCD gudogna ordaifer ed egualisescha seria
- Suenter duas prolungaziuns: Friburg va per segunda victoria
- Tavau egualisescha la seria