La Sauber Holding SA e cun ella il team da furmla 1 va cumplettamain en possess dal producent d'autos Audi.
Ad Ingolstadt en Baviera, en la sedia principala da la marca cun ils quatter rintgs, avevan ils responsabels oriundamain planisà cun ina cumpart maximala da 75% vi da la gruppa Sauber. Ils ulteriurs 25% fissan lura restads en ils mauns da l’actual schef da la maioritad, l’interprendider svedais Finn Rausing.
Cun la decisiun da surpigliar l'interpresa da Hinwil cumplainamain, elimineschan ils responsabels dad Audi ils ultims dubis davart l'entrada en la furmla 1 ch'è planisada per la stagiun 2026. Sco ultim hai adina puspè dà famas, il concern d'autos vegnia a desister da l'engaschament prevesì en la pli impurtanta seria da cursas en consequenza da restructuraziuns en l'etascha dals schefs.
La squadra da furmla 1 dad Audi vegn ad avair dus lieus da lavur. A Neuburg an der Donau en Baviera vegnan construids ils motors, a Hinwil ils chassis dals autos. Andreas Seidl che lavura actualmain sco mainafatschenta vegn ad avair en l'avegnir uffizialmain la rolla dal schef da la squadra. Actualmain vegn il Bavarais represchentà en quest uffizi dad Alessandro Alunni Bravi. Il Talian surpiglia la rolla da represchentant da la squadra.
