La victoria da l'emprim Grand Prix da Miami è ida a Max Verstappen. Il defensur dal titel en Red Bull ha gudagnà la cursa da furmla 1 davant il leader dal campiunadi mundial, Charles Leclerc en Ferrari ed il collega da team da lez, Carlos Sainz.
Per l'equipa dad Alfa Romeo hai danovamain dà puncts, grazia a Valtteri Bottas. El ha finì la cursa davos il duo da Mercedes sco 7avel. Ses collega da team, Zhou Guanyu ha stuì dar si la cursa pervi d'in defect. L'equipa da Hinwil è uschia vinavant sin il 5avel plaz da la tabella da cunstructurs.