Il sulet gol per la Svizra ha sajettà Seraina Piubel curt avant la pausa, al 1:1 intermediar. Avant aveva Glodis Viggosdottir manà en avantatg sia equipa, suenter radund in quart d’ura.
Il gol decisiv han las Islandaisas lura marcà en la 73avla minuta, tras Guony Arnadottir. En il temp supplementar han las Svizras lura anc gì la schanza d’egualisar, il tir da la distanza da Luana Bühler ha tutgà la latta.
Anc temp per progress
Uschia spetgan las Svizras vinavant sin l'emprima victoria, cun la nova trenadra Inka Grings. Fin uss han ellas dà trais pari, vitiers vegn la terrada actuala.
La fasa cun gieus da test cuntinuescha per las Svizras. La gronda finamira è lura il campiunadi mundial la stad. Quel cumenza per la Svizra ils 21 da fanadur cunter las Filippinas.
