Dals gieus olimpics da questa stad a Tokio na dastgan nagins fans da l'exteriur entrar en il pajais pervi da la pandemia. Quai han decis ils organisaturs giapunais ensemen cun il Comité olimpic internaziunal IOC.
Pervi da la pandemia da corona han ils organisaturs spustà l'occurrenza gronda sin quest onn. Ils gieus olimpics da stad cumenzan ils 23 da zercladur e duran enfin ils 8 d'avust 2021.
Gronda perdita per il turissem
Fin uss èn vegnids vendids radund in milliun bigliets a fans da l'exteriur. Per il preventiv dals organisaturs è questa perdita ina dira frida. Vitiers vegnan anc las consequenzas massivas per il turissem ch'ha quintà cun blers daners dals giasts dals gieus olimpics da stad a Tokio.
4,5 milliuns bigliets èn fin vendids en il Giapun. Sch'indigens dastgan insumma entrar en las arenas, vulan ils responsabels pir decider fin la fin d'avrigl.