Plaschair e dischillusiun èn fitg dasper in a tschel. Quai san ils dus passlungists engiadinais Noe Näff da Sent e Fabienne Alder da Puntraschigna.
Avant in’emna èn els vegni a savair ch’els èn selecziunads per ils gieus olimpics d’enviern ch’entschaivan quests dis. Il plaschair è stad immens per tuts dus ma els han era sentiments da dischillusiun, raquinta Noe Näff. Ses frar Isai che fa eira passlung en il cader B svizzer na è betg selecziunà per ils gieus olimpics.
La nova che jau sun selecziunà ha fatg sulischem bain. In quel mument vaiva pero in mix da sentimaints, che Isai na astga betg vegnir. Per mai era quai dantant insatge fitg bel.
Il frar da Fabienne Alder, Roman, è era passlungist en il cader B. Tar els ha la selecziun era stgarpà dapart la famiglia.
Jau sun schon trista. Normalmain è el adina cun mai. Nus trenain ensemen e fain cursas ensemen. Jau m’allegrel cur che jau sun puspè a chasa e pos far insatge cun el. El am manca schon.
Ils atlets eran uss in’emna a Seefeld per trenar, era Fabienne e Noe, dantant na betg mo per trenar era per furmar in team, ina famiglia olimpica. La furma mentala ed ina psica equilibrada sajan ussa gist uschè impurtantas sco la cundiziun e la tecnica. Perquai han ils trenaders era in vast program che ha sin la prima egliada nagut da che far cun il sport, sco per exempel far in “Streuselkuchen”.
Giorgio Rocca – ina legenda sportiva maina il fieu
L'anteriur sportist Talian ha gì l’onur da manar il fieu olimpic tras sia patria a Livigno. Bab talian e mamma Svizra – Giorgio Rocca viva a Schlarigna en Engiadina, ma è era dachasa en sia patria a Livigno.
Bellischem – igl è ina fitg bella experientscha da pudair purtar la flomma olimpica tras Livigno.
Quai èn ils pleds da Giorgio Rocca, suenter ch'el ha surdà la flomma a la proxima atleta. Livigno, nua che han lieu las disciplinas da Freestyle durant ils gieus olimpics Milano Cortina 2026.
Impressiuns
-
Bild 1 von 6. Bildquelle: RTR.
-
Bild 2 von 6. Bildquelle: RTR.
-
Bild 3 von 6. Bildquelle: RTR.
-
Bild 4 von 6. Bildquelle: RTR.
-
Bild 5 von 6. Bildquelle: RTR.
-
Bild 6 von 6. Bildquelle: RTR.
L'anteriur atlet talian en la disciplina slalom è stà 22 giadas sin il podest tar cuppas mundialas e da quellas 11 giadas sisum. Giorgio Rocca è sa participà a dus gieus olimpics, ina giada dal 2002 a Salt Lake City ed il 2006 a Torino en l'Italia. Il 2006 ha el gudagnà tschintg cursas da la cuppa mundiala, ma als gieus olimpics a Torino n'hai lura deplorablamain betg funcziunà.
Sco trenader vinavant activ
Giorgio Rocca è restà fidel al sport. Oz maina el diversas scolas da skis en Svizra ed Italia ed è tranter auter era magister da skis da persunalitads sco Gianna Nanini u Michelle Hunziker.
Sco abitant da Schlarigna enconuscha el fitg bain Vanessa Kasper che dastga sa participar quest onn als gieus olimpics. El trenescha ella tscherts dis.
Jau enconusch Rocca gia da pitschen e chat fitg bel da pudair collavurar cun el.
L’um da 50 onns è anc oz in skiunz activ, maridà la segunda giada e bab da quatter uffants creschids.