Pervia d'ina blessura n'ha ella betg pudì sa participar a la concurrenza da slopestyle la sonda passada. Perquai è Mona Danuser ida plain motivaziun en sia discplina preferida - big air. Dentant er là n'èsi betg ì tenor giavisch a la giuvna che visita il gimnasi da sport a Tavau. En la qualificaziun è ella cupitgada – ins ha stuì sgular ella cun ina squassada dal tscharvè en l'ospital.
Cun 10 onns cumenzà ad ir cun aissa
Mona Danuser è sco uffant ida cun skis, pir cun 10 onns ha ella midà sin l'aissa. Sch'ins abiteschia en la regiun da Flem vegnan ins quasi sfurzà dad ir cun aissa, di la giuvna da 17 onns cun in surrir. Oz na pudess ella betg pli s'imaginar ina vita senza snowboard. Oravant tut la disciplina big air plascha fitg. Ella giaja fitg gugent sur gronds sigls, e plinavant saja cool ch'ins stoppia mussar la prestaziun sin il punct cun in sigl.
Igl è simplamain mega bi da sgular sur ils gronds sigls.
Als gieus olimpics da giuvenils n'è Mona Danuser betg vegnida da mussar ses talent en la disciplina da big air. Quai na vegn dentant betg a franar ella. Ses siemi è da gudagnar in di ina medaglia olimpica.
RTR actualitad 11:00