Il travasch olimpic n'è nagut nov per Hanspeter Betschart. L'um da 39 onns è numnadamain gia dapi 10 onns entretschà en il manaschi. El è gia stà schefmedi per la delegaziun svizra tar ils gieus olimpics da giuventetgna ed è er gia stà part dal team medicinal tar ils davos trais gieus olimpics dals creschids. Questa giada è el dentant per l'emprima giada sco schefmedi. Las preparaziuns haja dentant gia cumenzà avant mais u schizunt onns.
Uss vegnan anc ils davos problems d'atletas ed atlets tschiffads per pudair sustegnair els da schliar quels, per che tuts sajan fit.
L'incumbensa principala da l'um da Son Gagl è ses team da radund 30 persunas è da procurar ch'atletas ed atlets vegnan accumpagnadas medicinalmain a moda optimala. Quai vala tant per en il vitg olimpic, sco er tar las concurrenzas.
Preparaziun per il magun pervi d'aua tschuffa
Gia dapi mais chaschuna il flum Seine che maina tras Paris discussiuns pervi da l'aua ch'è memia tschuffa. Igl n'è anc adina betg cler sch'atletas ed atlets pon ir en l'aua cura ch'i va liber – e quai malgrà ch'inqual politicher u politicra franzosa ha gia gughegià da far in sigl en l'aua per mussar ch'ella è schubra avunda. Perquai èn gist ils atlets che ston ir en l'aua vegnids preparads da Hanspeter Betschart.
Ins sa che magun e begl pon esser sensibels. Perquai avain nus empruvà da proveder la flora en quels organs optimalmain, per che las bacterias en l'aua n'han nagina schanza.
I saja gea in fatg ch'i dettia gia dapi onns in scumond per las abitantas ed ils abitants da Paris da far bogn en la Seine – quai haja bain ina raschun, manegia el. Perquai sajan questas preparativas impurtantas.
Il pli grond privel per tut las sportistas e sportists èn tenor Hanspeter Betschart dentant infects da tuttas sorts. Quels daventian questa giada puspè pli actuals.
Infects èn atgnamain la raschun principala ch'atletas ed atlets na pon betg clamar giu lur top-prestaziun tar concurrenzas.
La raschun persuenter è che tar ils davos gieus olimpics valevan anc restricziuns da corona sco per exempel mascras, questa giada betg. In ulteriura sfidas pudess er esser la chalur. Hanspeter Betschart e ses team quintan ch'i pudess anc vegnir pli chaud che tar ils gieus olimpics a Tokio, nua ch'igl è er gia stà fitg chaud. Perquai saja er fitg impurtant da tegnair en egl las temperaturas. Hanspeter Betschart spera che tut giaja bain, che tuttas e tuts restan sauns e ch'i dettia inqual medaglia svizra.