Siglir tar il cuntegn

Header

cuntegn

Gieus olimpics Peking 2022 – «One Year To Go»

En in onn spetgan ils proxims gieus olimpics d’enviern. Il favrer 2022 vegn cumbattì a Peking per medaglias olimpicas, quai en 109 concurrenzas. Tut en tut vegnan ad ir a la partenza bunamain 3’000 atletas ed atlets.

Peking, la citad principala da la China, aveva organisà il 2008 ils gieus olimpics da stad. Che la medema citad organisescha sper ils gieus olimpics da stad er quels d’enviern è ina premiera, quai n’hai anc mai dà.

audio
Gieus olimpics Peking: En in onn vai liber
ord Actualitad dals 05.02.2021.
laschar ir. Durada: 3 minutas 43 Secundas.

Uschè gronda delegaziun svizra sco anc mai

Wow, en in onn èsi gia uschè lunsch. Quai è fitg motivant da dar tut gia uss en ils trenaments sco er en las cursas.
Autur: Aita Gasparin biatleta

Ina gronda delegaziun quinta er Swiss Olympic trametter a Peking, numnadamain 180 atletas ed atlets, intgins dapli ch’anc als davos gieus olimpics il 2018 a Pyeongchang en la Corea dal Sid ed ina uschè gronda delegaziun sco anc mai. Gia il ticket en satg han las duas equipas naziunalas da hockey dals umens e da las dunnas. En curt vegnan era ils emprims biatlets selecziunads.

Pandemia da corona
Legenda: Il cumbat encunter la pandemia da corona è e resta la gronda sfida. Keystone

Gronda sfida per Swiss Olympic

Ils gieus olimpics a Peking cumenzan be 180 dis suenter ils gieus olimpics da stad a Tokyo. Organisar dus tals gronds eveniments parallel, quai saja ina gronda sfida di Ralph Stöckli, il Chef de Mission da Swiss Olympic. Ma els sajan sin buna via ed er a Peking saja quasi tut pront.

La pandemia da corona dat avant il tact.
Autur: Ralph Stöckli Chef de Mission Swiss Olympic

Ils gieus olimpics vegnan organisads en trais differentas regiuns. Tut las occurrenzas en hallas e stadions sco curling u hockey sin glatsch èn a Peking. Là vegn per gronda part duvrà ils stadions ch’eran vegnids construids per ils gieus olimpics da stad. Uschia vegn per exempel giugà en in onn curling en il stadion nua che las occurrenzas da nudar han gì lieu il 2008.

Las occurrenzas sin la naiv sco las cursas da skis, biatlon u passlung èn bun 100 respectiv 200 kilometers en il nord da Peking. Per arrivar en questas regiuns è vegnì construì ina nova lingia da tren d’auta sveltezza.

Ralph Stöckli
Legenda: Ralph Stöckli sto planisar parallel ils gieus olimpics da stad a Tokyo ed ils gieus olimpics d’enviern a Peking. Keystone


Clima sco a Pyeongchang

Sper la pandemia da corona è il clima ina da las sfidas a Peking, gist en las muntognas. I saja da quintar cun temperaturas fin a minus 20 grads, uschia il schef-medi da Swiss Olympic, Patrik Noack. Er la qualitad da l’aria na saja betg la meglra, quai che pudessi forsa far intgins problems ad atletas ed atlets che patescha dad asma.

Pertutgant il coronavirus cusseglia Swiss Olympic lur atletas ed atlets da laschar virolar. Fin ussa n’è quai dentant nagin obligatori.

RTR actualitad 17:00

Artitgels legids il pli savens