Gieus olimpics – resultats - Odermatt e Meillard fan proximas medaglias per la Svizra

• L'emprima medaglia olimpica da la Svizra è gist ina dad aur🥇. Franjo von Allmen gudogna la cursa rapida - quella disciplina roiala nua ch'el è er daventà campiun mundial.
• Mathilde Gremaud va per la segunda medaglia d'aur🥇per la Svizra – quai en la disciplina da slopestyle, sco gia avant quatter onns.
• En la cumbinaziun da team va il duo von Allmen/Nef per la terza medaglia d'aur 🥇per la Svizra. Plinavant hai dà ina medaglia d'argient per il duo Odermatt/Meillard🥈.
• En il sigl cun skis sin la schanza normala siglia Gregor Deschwanden ad ina medaglia da bronz 🥉.
• Al Super-G scriva Franjo von Allmen istorgia cun sia terza medgaglia d'aur🥇. Marco Odermatt ha fatg bronz🥉.
• En il slalom gigant ha Marco Odermatt gudagnà la medaglia d'argient 🥈, ses collega d'equipa Loïc Meillard ha fatg bronz🥉.

Qua datti l'entira survista da las medaglias olimpicas

175 atletas svizras – 26 Grischuns e 6 Rumantschas

Swiss Olympic trametta als 25avels gieus olimpics d’enviern Milano Cortina 2026 en l’Italia dal Nord 91 sportists e 84 sportistas – total 175 – a las concurrenzas. Da las 16 disciplinas en il program olimpic è la Svizra part da 14 disciplinas; sulet en la cumbinaziun nordica ed en il short track na datti nagins atlets u atletas da la Svizra.

54% dals nominads èn novizs a gieus olimpics. La delegaziun svizra traglischa dentant er cun rutina e renum. Uschia figureschan 14 sportistas e sportists ch'han gia almain gudagnà ina medaglia a gieus olimpics d'enviern. Tranter els Marco Odermatt, Wendy Holdener u era Mathilde Gremaud.

Ils 175 atletas ed atlets èn in nov record. Tar ils gieus olimpics a Peking il 2022 era la Svizra da la partida cun 167 persunas. Tar ils ultims gieus olimpics en l'Italia, il 2006 a Torino, dumbrava la delegaziun svizra 130 atlets.

Grischuns e Rumantschas

15% da las sportistas e sportists svizzers als gieus olimpics 2026 èn Grischuns, numnadamain 26 da 175. Da quels 26 discurran sis rumantsch. Las pli bleras atletas ed atlets grischuns èn a la partenza en il passlung, numnadamain sis.

Rumantschas e Rumantschas als gieus olimpics 2026

Puncts culminants ord vista grischuna e svizra

Sonda, 7 da favrer, 11:30: L'emprim di da concurrenza stat gia la disciplina roiala dal ski alpin sin il program, la cursa rapida dals umens sin la pista Stelvio a Bormio. La Svizra ha cun Marco Odermatt u er Franjo von Allmen almain dus trumfs.

Dumengia, 8 da favrer, 11:30: In di pli tard sa mesiras las meglras skiunzas da speed en la cursa rapida a Cortina sin la pista Olimpia delle Tofane. Las atletas svizras tutgan betg tar las favuritas, cun Corinne Suter è dentant la campiunessa olimpica dal 2022 a la partenza. Er la Grischuna Jasmine Flury è a la partenza.

Glindesdi, 9 da favrer, 12:30: Il slopestyle è la carta da visita dal sport da freestyle, i quintan sigls spectaculars, moviments cun stil e platgadas segiras. La skiunza Mathilde Gremaud n'è betg be la campiunessa olimpica da slopestyle dal 2022 mabain anc adina ina atleta che marca la scena. Er la Grischuna Giulia Tanno va a la partenza, per ella daventa il siemi olimpic finalmain realitad, quai suenter ch'ella ha manchentà las ultimas duas giadas pervia da blessuras.

Mardi, 10 da favrer, 12:30: Cun Andri Ragettli da Flem e Kim Gubser da Tavau han gist dus freeskiers grischuns ambiziuns da mussar lur megliers sigls en il slopestyle. Ragettli aveva manchentà als gieus olimpics da Pyeongchang 2018 e Peking 2022 da turnar a chasa cun ina medaglia. A Livigno, datiers dal cunfin grischun, vul el midar quai.

Sonda, 14 da favrer, 10:00 / 13:30: Tuts cunter Marco Odermatt, quai è probabel il motto dal slalom gigant. L'atlet da la Sutsilvania è il dominatur da la stagiun actuala e da las quatter stagiuns passadas. Er in Grischun va a la partenza dal slalom gigant olimpic, numnadamain Thomas Tumler da Samignun. Questa stagiun n'èsi anc betg reussì ad el da far ina plazza da podest, l'ultima ha Tumler dentant mussà ch'el è bun da far quai.

Dumengia, 15 da favrer, 10:00 / 13:00: Er en il slalom gigant da las dunnas pudessi dar ina medaglia olimpica svizra. Camille Rast ch'è en la furma da sia vita è gia stada en questa disciplina pliras giadas sin il podest. Legraivlamain è er in'atleta rumantscha a la partenza. Vanessa Kasper da l'Engiadin'Ota è sa qualifitgada grazia a buns resultats per ils gieus olimpics. Quai suenter ch'ella ha stuì surmuntar bain inqual obstachel.

Gievgia, 19 da favrer, 13:55 / 14:15: Las cursas cun skis da turas (ski mountaineering) festivescha en l'Italia premiera olimpica. Il cader svizzer ha pli ch'in trumf da medaglias. Marianne Fatton è campiunessa mundiala en il sprint e tar ils umens vala Jon Kistler (bronz campiunadi mundial 2025) sco candidat per in bun rang. Cun Arno Lietha dal Partenz è er in Grischun a la premiera da las concurrenzas da skis da turas.

Venderdi, 20 da favrer (dunnas) e sonda, 21 da favrer (umens): Il skicross è tradiziunalmain ina disciplina cun bleras bunas atletas ed atlets svizzers. Fanny Smith è tar las dunnas franc ina da las favuritas per ina medaglia. Da sperar è er che Talina Gantenbein da Scuol po brigliar e forsa procurar per ina surpraisa rumantscha. Cun Ryan Regez ha la Svizra a la partenza il skicrosser ch'è campiun mundial actual ed il campiun olimpic dal 2022.

Gievgia, 19 da favrer (dunnas) e dumengia, 22 da favrer (umens): Il turnier olimpic da hockey empermetta quest onn blera tensiun er grazia als superstars da la NHL ch'èn da la partida. Cun Nino Niederreiter dals Winnipeg Jets e Ken Jäger che gioga tar Losanna èn dus Grischuns en las retschas da la squadra naziunala da hockey svizra.

Tar las dunnas èn il Canada ed ils Stadis Unids las duas naziuns ch'han fin uss gudagnà il titel olimpic. La squadra svizra ch'è tschintgavla en la rangaziun mundiala ha dentant er schanzas sin ina medaglia. Cun Leoni Balzer è ina Grischuna sin il glatsch.