Envers l'ultim preventiv supponan ils organisaturs dals gieus olimpics da stad a Tokio 2021 dapli expensas en autezza da 2,5 milliardas francs. Radund 6 milliardas dals custs totals da 13,6 milliardas francs ston pajar ils organisaturs. Ulteriurs 5,8 milliardas francs sto surpigliar la citad da Tokio. La regenza dal Giapun sa participescha cun 1,8 milliardas. Avant set onns, cura ch'il comité olimpic ha surdà ils gieus a Tokio avev'ins budgetà custs totals da 6,6 milliardas francs.
Malgrà las stentas da spargnar s'augmentan ils custs en spezial pervi da las mesiras da corona e pervi dal spustament dals gieus.
Indigens èn skeptics
En in'enquista publitgada avant in'emna è ina maioritad da la populaziun giapunaisa dal maini da betg organisar ils gieus olimpics la stad che vegn. 32% han votà per dir giu ils gieus, 31% han vulì spustar ils gieus anc ina giada e be 27% èn dal maini ch'ils gieus duain avair lieu sco planisà.