Siglir tar il cuntegn
cuntegn

Pyeongchang 2018 Argient per Feuz en il super-G

Suenter bronz en la cursa rapida gudogna Beat Feuz surprendentamain argient en il super-G. Campiun olimpic è l'Austriac Matthias Mayer. Kjetil Jansrud gudogna bronz.

Skiunz svizzer.
Legenda: Beat Feuz gudogna sia segunda medaglia a Pyeongchang. Keystone

Il podest

  • 1. Matthias Mayer (Ö) 1:24,44
  • 2. Beat Feuz (Sz) + 0,13 secundas
  • 3. Kjetil Jansrud (No) + 0,18 secundas

Suenter bronz en la cursa rapida gudogna Beat Feuz surprendentamain sia segunda medaglia entaifer 24 uras. En il super-G vegn el segund davos l'Austriac Matthias Mayer. Ses ultim plaz da podest en questa disciplina ha il Schangnauer festivà avant passa in onn, numnadamain sco terz a Kitzbühel il schaner 2017.

En questa stagiun èn stads ses resultats ils plazs 12, 25, 10 e 6. Gist sin il punct culminant da la stagiun èsi dentant gartegià a Beat Feuz da daventar pli e pli ferm en il super-G. I sa tracta da la quarta medaglia per Feuz tar eveniments gronds. En il super-G èsi però ina premiera.

Ils ulteriurs Svizzers

Ils ulteriurs Svizzers n'han betg pudì persvader en il super-G. Sco gia en la cursa rapida gievgia èsi be reussì a Beat Feuz da mussar ina ferma prestaziun.

  • 21. Gilles Roulin + 1,76 secundas
  • 26. Thomas Tumer 2,08 secundas
  • Out: Mauro Caviezel

In' èra va a fin

Hermann Maier è stà il 1998 il davos campiun olimpic en il super-G che na deriva betg da la Norvegia. Ils ultims 20 onns han mintgamai triumfà ils Norvegiais Kjetil André Aamodt (2002, 2006), Aksel Lund Svindal (2010) e Kjetil Jansrud (2014).

Mayer campiun olimpic dubel

A Matthias Mayer èsi uss gartegià da surmuntar questa dominanza. L'Austriac da 27 onns è grazia a sia victoria campiun olimpic dubel. Avant quatter onns ha el gudagnà aur en la cursa rapida a Sotschi.

RR novitads 06:00