Siglir tar il cuntegn
cuntegn

Pyeongchang 2018 AUR ed ARGIENT svizzer en il slopestyle

Las skiunzas da freeski svizras procuran per in veritabel coup als gieus olimpmics. Sarah Höfflin e Mathilde Gremaud gudognan aur ed argient en il slopestyle ed uschia medaglia 6 e 7 per la Svizra.

Sarah Höfflin e Mathilde Gremaud procuran per ina victoria dubla svizra en il slopestyle.
Legenda: Sarah Höfflin e Mathilde Gremaud procuran per ina victoria dubla svizra en il slopestyle. Keystone

La Genevrina da 27 onns e la Friburgaisa da 18 eran gia sa qualifitgadas a moda suverana per il final. Höfflin ha anc ina giada pudì sa megliurar en il terz run e piglià davent avant il nas la medaglia d'aur a sia cumpatriota Mathilde Gremaud. Bronz è ì a la britannica Isabel Atkin.

Carriera tut auter che convenziunala

Höfflin è la segunda skiunza da freestyle svizra che gudogna aur olimpic. Quai suenter Evelyn Leu il 2006 a Turin. La carriera da la Genevrina è tut auter che convenziunala. Pir cun 20 onns è ella numnadamain vegnida tar il freestyle. Il 2017 ha ella gudagnà il classament general da la cuppa mundiala en il slopestyle.

RR novitads 07:00