Siglir tar il cuntegn

Pyeongchang 2018 Cologna e Ragettli cun bunas schanzas sin aur olimpic

Venderdi vegn il fieu olimpic envidà a Pyeongchang. Cun in record da 171 sportistas e sportists è Swiss Olympic en la Corea dal sid e cumbatta per medaglias. En il ravugl da tut quests atlets èn era plirs grischuns cun schanza sin ina medaglia olimpica.

Purtret da rintgs olimpics a Pyeongchang.
Legenda: La flomma olimpica vegn gia bainbaud envidada a Pyeongchang. Keystone

Trais medaglias olimpicas ha Dario Cologna gia. En questa stagiun ha il passlunghist da 31 onns gudagnà per la quarta giada en sia carriera il Tour de ski. Surtut en il skiatlon pudess Dario Cologna gia l'emprima dumengia dals gieus olimpics star il pli sisum il podest.

Grondas èn las spetgas en il giuven skiunz da Slopestyle da Flem. En las trais cursas da la cuppa mundiala da questa stagiun è Andri Ragettli adina stà sin il podest. Ina giada il pli sisum. Ed il giuven da 19 onns è a la testa dal classament general da la cuppa mundiala da Slopestyle. Ed als X-Games ad Aspen ha Ragettli gudagnà la medaglia da bronz.

Ulteriurs atlets grischuns cun bunas schanzas da medaglia

Nevin Galmarini è stà en questa stagiun en 4 da 7 slaloms gigants parallels da snowboard sin il podest. Las duas ultimas cursas avant Olimpia ha l'Engiadinais da 31 onns terminà sin ils plazs in e dus. Galmarini è era a la testa dal classament general da la cuppa mundiala. E Nevin Galmarini sa co ins gudogna medaglias olimpicas. 2014 a Sotchi è el vegnì segund.

En il skicross è Alex Fiva en il ravugl dals top atlets cun schanza da far ina medaglia. Ed en il biatlon vegn Selina Gasparin suenter sia pausa da mamma adina meglier en furma. Suenter argient a Sotchi ha era ella en mira da repeter il success, sche na en la cursa singula forsa cun la staffetta. Ed el mund dal ski alpin èn las mirveglias grondas tge che Carlo Janka vegn da far. L'atlet da Sursaissa ch'è stà blessà e ch'ha fatg en questa stagiun nagina cursa en la cuppa mundiala survegn la schanza da Swiss Olympic da parter a Pyeongchang en las disciplinas spertas. La premiera dal super-g sin la pista olimpica ha Janka gì gudagnà.

RR Sportissimo 17:00