Il skiunz Ramon Zenhäusern porta la bandiera svizra tar la ceremonia finala. Il Vallesan da 25 onns vegn a manar la delegaziun svizra en il stadion olimpic a Pyeongchang. Quai ha decis Swiss Olympic. Ils 23avels gieus olimpics d'enviern van a fin dumengia las 12:00 temp svizzer.
Zenhäusern ha surprendentamain gudagnà la medaglia d’argient en il slalom. Igl è stà l'emprima medaglia svizra en il slalom dapi 38 onns. Ensemen cun Daniel Yule, Wendy Holdener e Denise Feierabend ha el schizunt gudagnà aur en la concurrenza d’equipa.
Tar l’avertura dals gieus olimpics avant trais emnas aveva Dario Cologna purtà la bandiera svizra.
Atlets russ vinavant suspendids
La Russia resta er suenter la fin dals gieus a Pyeongchang suspendida. Quai pervi dal scandal da doping. Uschia na dastgan els er betg entrar en il stadion cun l’atgna bandiera a la ceremonia finala. Quai ha decis il comité executiv dal Comité olimpic internaziunal IOC.
RR novitads 06:30