Siglir tar il cuntegn
Inhalt

Pyeongchang 2018 Hockey: Segunda victoria per las dunnas svizras

Las giugadras da hockey svizras han gudagnà cun 3:1 cunter il Giapun ed èn uschia qualifitgadas per ils quartfinals.

Duas giugadras e la golia sa giubileschan sin il glatsch.
Legenda: La squadra da dunnas svizra gudogna cun 3:1 cunter il Giapun. Keystone

Quatter onns suenter la medaglia da bronz a Sotchi è la squadra naziunala puspè sa qualifitgada per ils quartfinals. En lur segund gieu a Pyeongchang han las dunnas svizras gudagnà cunter il Giapun cun 3:1. Als ultims dus campiunadis mundials avevan las hockeyanas mintgamai manchentà ils quartfinals.

Sara Benz, la giuvna da 25 onns da Winterthur, ha en il segund terz aifer 171 secundas fatg dus gols. Benz ha dapi Sotchi manchentà duas stagiuns pervi dad ina stremblida dal tscharvè, cunter il Giapun è ella però puspè stada cumplainamain en furma. Per il 3:0 ha lura Alina Müller procurà en la 45avla minuta.

Excellent è er puspè la prestaziun da la golia Florence Schelling stada. Suenter che la Svizra ha gudagnà cun 8:0 cunter la squadra unida da la Corea, ha Schelling survegnì pir suenter 107:33 minutas da quest turnier olimpic l'emprim cuntragol.

RR novitads 11:00