Siglir tar il cuntegn
cuntegn

Pyeongchang 2018 Las flommas olimpicas èn stizzadas

Ils gieus olimpics a Pyeongchang èn istorgia. Il president dal comité olimpic Thomas Bach ha remunerà ils 23avels gieus olimpics sco «gieus da novs horizonts».

Ceremonia finala.
Legenda: Las flommas èn stizzadas, la tenuta da pasch dua cuntinuar. Keystone

Il president dal comité olimpic ha finì ils gieus olimpics a las 13:40 temp svizzer. Cun ina ceremonia finala da dus uras èn tut las atletas ed atlets vegnids festivads anc ina giada. La delegaziun svizra è vegnida manada dal skiunz - Ramon Zenhäusern.

«Gieus da nov horizonts»

Thomas Bach ha discurrì da «gieus da novs horizonts» en connex cun ils gieus a Pyeongchang. En la Corea dal Sid hajan ins ils davos 17 dis vesì gieus olimpics che mussan la via en il futur, uschia Bach. Il medem mument ha el envidà «la giuventetgna dal mund» als proxims gieus olimpics d'enviern. Quels han lieu il 2022 a Peking.L a bandiera olimpica è vegnida surdada simbolicamain al president da la citad da Peking.

Er saja el losch che la pasch olimpica vegnia anc respectada. Explicit ha el numnà l'exempel dals atlets da la Corea dal Nord e la Corea dal Sid, ch'èn tar tuttas dus ceremonias entrads communablamain en il stadion. Els hajan mussà ch'il sport possia colliar la glieud en in mund fragil. Il comité internaziunal vegnia a cuntinuar quel dialog olimpic, er suenter che las flommas olimpicas sajan stizzadas.

RR novitads 17:00